Euskaraz ez dakiten gurasoek ipuinen bidez ikasten segituko dute Erandion

Erica Liquete ipuin-kontalari sopeloztarra da Sorgina Txirulina. HODEI TORRES

Joan den martxoan arrakasta handia izan ondoren, Erica Liquete ipuin-kontalari sopeloztarrak Sorgina Txirulinaren hainbat tailer berri eskainiko die Erandioko guraso erdaldunei, seme-alaben laguntzagaz euskarara hurreratzeko. Saioak urriaren 20tik abenduaren 15era izango dira, zapatuetan, 17:30ean; daborduko, izena eman daiteke.

Erandioko Udaleko Euskara Zerbitzuak antolatu du ekimena; adierazi dutenez, helburua da "euskaraz ez dakiten helduak euskarara hurbiltzea txikien laguntzagaz". Beraz, tailerrean nagusiek umeekin batera parte hartuko dute.

Saio bakoitzean, Sorgina Txirulinak eguneroko gai bat landuko du: otorduak, parkean jolastea, eskola, bainu-ordua, oheratzeko unea, eta abar. Ipuina gai horren gainekoa izango da; gero etxean, tailerrean ikasitakoa erabili ahal izango dute.

Saioek ordubete iraungo dute: lehenengo zatian ipuin-kontaketa izango da; eta bigarrenean, tailer praktiko bat. Saioa amaitutakoan, ikasitakoa bilduko duen materiala banatuko dute, etxera eramateko.
Parte hartuko duten umeek 4 eta 8 urte bitartekoak izatea gomendatu du Euskara Zerbitzuak.

Izen-ematea online egin beharra dago Euskara Zerbitzuaren webgunean: Erandiokoeuskarazerbitzua.eus. Inskripzioa egiteko epemuga izango da tailer bakoitzeko aurreko astelehena. Lekuak mugatuak direnez, leku guztiak betez gero, zozketa egingo da. Argibide gehiago gura izanez gero, honako bitarteko hauek erabil daitezke: euskara@erandio.eus posta elektronikoa eta 944 890 128 telefonoa.

Tailerren egitaraua

Urriak 20, zapatua

  • 17:30 "Ama, aita, euskara koloreztatu!" solasaldia eta tailerra, Astrabuduko Josu Murueta kultur etxean. Saio berezi horretan, umeek nagusiei euskara irakasteko ideiak landuko dira.

Urriak 27, zapatua

  • 17:30 "Nerearen Musika jostailua", Altzagako ludotekan.

Azaroak 3, zapatua

  • 17:30 "Eta gaur, zer jango dugu?", Astrabuduko Josu Murueta kultur etxean.

Azaroak 10, zapatua

  • 17:30 "Plisti-plasta", Altzagako ludotekan.

Azaroak 24, zapatua

  • 17:30 "Bazen behin...", Altzagako ludotekan.

Abenduak 1, zapatua

  • 17:30 "Euskararen Musika", Astrabuduko Josu Murueta kultur etxean.

Abenduak 15, zapatua

  • 17:30 "Gabonak", Altzagako ludotekan.
Erlazionatuak

Guraso erdaldunak euskarara hurreratzeko tailerrak antolatuko dituzte Erandion

Erandio Sopela

Erandioko Udaleko Euskara Zerbitzuak hainbat tailer antolatu du Erica Liquete ipuin-kontalari sopeloztarragaz batera, alegia, Sorgina Txirulinagaz....
Erica Liquete: "Txikiek gurasoei euskara irakasteak motibazio-puntua ematen dio proiektuari"

Sopela

Sorgina Txirulina proiektua hasi berri du Erica Liquete Villamor sopeloztarrak, euskaldunak ez diren gurasoek euskara ikas dezaten, ipuinen eta sem...