Koronabirusa Uribe Kostan

Adinekoei deitzen hasi dira Barrikako eta Leioako Udalak, euren beharrez galdetzeko

Koronabirusaren ondorio latzenak jasateko arrisku gehien daukatenak babesteko asmoz elkartasun-sareak ugaritu egin dira egunotan. Barrikako eta Leioako udalek, besteak beste, jakinarazi dute adineko pertsona denei deika hasi direla, ondo ote dauden galdetzeko eta Eusko Jaurlaritzak antolatutako Guztion Artean zaintza-sarearen laguntza eskaintzeko, behar balute.

Leioaren kasuan, bakarrik bizi diren 65 urtetik gorakoei deika dabiltza azken egunotan Udaleko Gizarte Ongizate Saileko beharginak. “Deien helburua da haietako bakoitzaren egoera ona egiaztatzea, eskari berriei erantzutea eta Eusko Jaurlaritzak gure adinekoentzat abian jarri dituen zerbitzuak eskaintzea, eguneroko bizitzako beharrei erantzuteko laguntza eman diezaieketen boluntarioen taldeak koordinatuz, beharrezkotzat joz gero”, azaldu dute.

Barrikan, berriz, 70 urtetik gorakoakaz harremanetan jartzen dabil Udala, euren egoeraz galdezka. Adin horretatik gorako 193 pertsona bizi dira udalerrian, zehaztu dutenez. Bestalde, Udalaren ordutegia eta funtzionamendu berria azalduko diete banan-banan. Arretarako telefonoa 94 677 10 62 dela gogorazi dute.

Erlazionatuak

Auzokideen zaintza bermatzeko herritarren sareak martxan

Uribe Kosta

Koronabirusaren krisiak eragindako larrialdi-egoerak arazo handiak ekar ditzake gizartean. Hori dela eta, elkarren arteko zaintza eta babesa bermat...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun