EUDELeko elkarteburu eta Gasteizko alkate Gorka Urtaranek azaldu du udal askoren eskariari erantzun guran erabaki dutela "ezohiko ekimen hau" aurrera ateratzea. Urtaranek zehaztu du batez ere udal txikiak dabiltzala laguntza eske, eta azaldu du EAEKo udal gehienek ez dutela maskarak erosteko baliabiderik, ezta haien merkatura ailegatzeko autonomia nahikorik ere.
“Alkateak, borondate onez, maskarak lortzen saiatzen ari dira", esan du EUDELeko buruak, "baina zalantza handiak dituzte, ez baitituzte hornitzaileak ezagutzen (ez dira udal-zerbitzuetako ohiko hornitzaileak), ezta eskainitako produktuaren kalitatea eta erabilgarritasuna ere”. Izan ere, gaur egungo atakan, sektorean dagoen espekulazioak arriskuak eta zailtasunak sortzen du horrelako erosketa bat egiteko orduan, aditzera eman dutenez.
Prezioa zahaztu barik, baina "merkea"
Maskarak EUDELen bitartekoakaz finantzatu direla azpimarratu du elkarteak (ez dute ordaindutako zenbatekoa adierazi gura izan). Oraingoan dohainik emango zaizkie udalei, eta etorkizunean, beharra balego, erosketak EUDELen bitartez koordinatzeko eta lana errazteko bidea irekita dagoela nabarmendu dute, kasu horretan udal bakoitzak berea ordainduz. Gaurtik banatuko den partidari dagokionez, prezio zehatza adierazi ez badute ere, nahiko merkea eskuratu dituztela azaldu dute, eskariaren tamainagatik (izan ere, Eusko Jaurlaritzagaz batera erositako sail handiago baten barruan dauden 300.000 maskarak).
Bestalde, udal batzuk beren kasa dabiltza herritarrei emateko maskarak erosten. Uribe Kostan, hain zuzen, hala egingo dutela iragarri dute egunotan Leioak eta Sopelak. EUDELeko iturrien esanetan, hori kontuan hartu barik egingo da 300.000 maskaren banaketa, "nork bere aldetik lor dezakeenari gehitzea" baita oraingo dohaintzaren helburua.
Bizkaian 145. 000 alde banatuko dituzte, Araban 43.750, eta Gipuzkoan 107.000. Uribe Kostako udalerri bakoitzari kopuru hau egokituko zaio:
- Barrika: 250
- Berango: 1.200
- Erandio: 4.000
- Getxo: 10.000
- Gorliz: 1.200
- Leioa: 4.000
- Lemoiz: 250
- Plentzia: 700
- Sopela: 2.000
- Urduliz: 700
- DENERA: 24.300
