Euskal Herriak dituen biztanle adina kilometro ibiltzea da Izan Bidea ekimenaren erronka: 3.127.326. Uribe Kostan, esaterako, oinezko martxak egin ziren ekainaren 21ean. "Orain, gure aldarrikapenak mendien tontorretara eramateko erronka ezarri diogu geure buruari", azaldu du Sarek.
Tontor horietako bat Munarrikolanda izango da, Berango eta Sopelaren arteko mugan. Bertara igotzeko txangoa 10:00etan hasiko da, Berangoko metro-geltokian. Eskualdeko beste hitzordua Gorlizko Ermua mendira igotzeko izango da. Hasiera Gorlizko hondartzako aparkalekuan egingo dute, 10:00etan ere bai.
"Kilometroak eta urratsak batzen ari gara, helburu argi batekin: euskal presoen arazoari konponbidea ematea, eta bizikidetza eta bakea lortzeko aurrerantz joatea", dio Sarek, "gizartearen aktibazioa erakundeen lanarekin uztartuz egoera honi behin betiko irtenbidea eman dakiokeela uste dugu". Presoak Euskal Herrira ekartzeko gizartearen eta erakundeen kontsentsua dagoela azpimarratu du elkarteak.
