Hainbat herritarrek aldaketa sozial eta ekonomikoak eskatu dituzte Aldaketaldian

Hainbat herritarrek eskatu zuten itsasadarraren azpiko autobidea ez egiteko, eta garraio publikoa eta bizikleta sustatzeko. © AZKORRI BIZIRIK

Zapatuan gure herrietan hainbat ekintza antolatu zituzten krisi ekologiko eta soziala salatzeko, eta aldaketa eskatzeko. Getxon itsasadarraren azpiko autobidea ez egiteko eskatu zuten, eta Sopelan hipermerkatuaren aurkako elkarretaratzea egin zuten; Erandion eta Berangon ere askotariko aldarrikapenak entzun ahal izan ziren.

Pandemiaren eraginez ezarritako mugikortasun-mugek ez dituzte zapatuko Aldaketandiaren ekimenak geldiarazi. Hainbat erakunde sozialek deituta, EAEko herri askotan ekintzak egin dituzte, ekologikoki eta ekonomikoki jasangarriagoa den garapen bidezko baten alde.

Gure eskualdean, Berangon, Getxon, Sopelan eta Erandion egin zituzten ekintzak zapatuan. Sukar Horia, GuNek eta Azkorri Bizirik deituta, 80 lagun baino gehiagok itsasadar azpiko autobidea ez egiteko eskatu zuten; horren ordez, "proiektu faraoniko eta antiekologikoen" aurrean, garraio publikoa eta bizikleta bultzatzeko eskaera egin zuten. Ildo berean, Sopelako Bareñon, hipermerkatuaren kontrako plataformak deituta, hainbat herritar batu ziren udaletxe aurrean. Deitoratu zutenez, proiektu horrek kotxe pribatuen erabilera sustatu, herria zatitu eta ondare arkeologikoaren suntsipena eragingo ditu, besteak beste.

Erandion ere kutsaduraren aurkako mobilizazioak egin zituzten, Auzokoa Herrikoi Elkartea eta Herri Bideak Kate Barik elkarteek deituta. Erandioztarrek auzoetan zehar ibilaldia egin zuten Altzagaraino, eta, bertan, manifestu bat irakurri eta banderolen bidez giza-kate bat osatu zuten.

Berangon, aldiz, Berango Lurraren Defentsan elkarteak deia egin zuen Otxabene ingurua zaborrez garbitzeko, berdeguneak defendatzeko errebindikazioa ere eginez. 

Erlazionatuak

Gaur egungo krisi ekologikoa eta soziala salatzeko hainbat elkarretaratze egingo dituzte zapatuan

"Aldaketaldia" izeneko mobilizazio ekologistagaz bat eginez, elkarretaratzeak egingo dituzte zapatuan, urtarrilaren 30ean, larritasun klimatiko, so...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun