Elkarrizketak

"Tresna bat behar nuen aditzak modu erraz eta arinean jokatzeko"

Ander Herranz, AEKko euskara irakaslea eta Adizkinator aplikazioaren sortzailea.

Adizkinator izeneko doako aplikazioa sortu du Ander Herranz AEKko euskara irakasleak. Tresna horrek eskaintzen ditu Euskaltzaindiak euskara baturako onartu dituen adizki laguntzaile eta trinko guztien modu neutroak, baita hikako forma alokutiboak ere. Hala, erabiltzaileek aditzak jokatu eta bilatzeko aukera dute modu erraz eta azkarrean app hori erabilita. Horren zehaztasunak eman dizkigu sortzaileak oraingoan.

Nondik dator mota horretako aplikazio bat sortzearen ideia?

Adizkinator egiteko pizgarria beharra izan zen. Tresna bat behar nuen aditzak modu erraz eta arinean jokatzeko, hau da, hizkuntzaren gainean hitz egiten dugunean erabiltzen ditugun hitzak erabiltzen zuena. Azken helburua zen adizki bat behar genuenean, ahalik eta azkarren lortzea gauden lekuan gaudela. Horretarako gurekin beti daramagun telefonoa euskarri ezin hobea zela iruditu zitzaidan, hainbat lanabes baititugu bertan, eta aditzak jokatzekoa ere lekua izan zezakeen.

Nolakoa izan da horren sortze-prozesua?

Prozesuak hainbat atal izan ditu, batzuk neketsuagoak, besteak politagoak eta dibertigarriagoak. Aditzak biltzea eta aplikazioan sartzea, adibidez, oso monotonoa eta luzea izan zen, batez ere aditz trinkoak ere sartzea erabaki nuenean. Forma ematea eta soluzioak bilatzea, aldiz, politagoa eta dibertigarriagoa izan zen: gero eta erabilgarriagoa zen puzzle bat egitea bezala.

Zelan funtzionatzen du?

Bi modu daude aplikazioa erabiltzeko. Aditz bat joka dezakegu edo adizki bat bilatu. Aditza jokatzeko zerrenda batzuetan aditza, modua, denbora eta pertsonak sakatuta adizkia emango digu. Beste aukerak kontrako bidea egiten du. Adizkia sartuko dugu, adibidez “dizut”, eta aplikazioak informazio guztia emango digu.

Zelako harrera izan du orain arte?

Harrera ona izan du; orain arte, 2.000 bat erabiltzailek deskargatu dute, eta inguruko jendeak esan dit gustuko duela. Gehienak euskara ikasleak edo euskararekin lanean diharduten pertsonak dira, baina, noski, zalantza edo jakin-mina duen edonork erabil dezake.

Erlazionatuak

Aditzak jokatu eta bilatzeko aplikazioa sortu du Uribe Kostako euskara irakasle batek

Uribe Kosta

Adizkinator izeneko doako aplikazioa sortu du Uribe Kostako AEKko euskara irakasle batek. Tresna horrek eskaintzen ditu Euskaltzaindiak euskara bat...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun