Azken egunotan bizi izan duten kriminalizazioari aurre eginez, COVID-19aren izurriteari aurre egiteko osasun-neurri guztiak beteta kalera atera ziren atzo, martxoaren 8an, milaka emakume euren aldarrikapenak ozen oihukatzera. "Pandemiaren aitzakiaren pean, etxean zokoratu nahi izan gaituzte, ikusezin bihurtu. Baina hemen gaude, bizitza ospatzen. Alaitasunez. Borrokatzeko prest!", adierazi zuten Getxoko mugimendu feministakoek manifestazioa amaitu ondoren. Algortako kaleak alderik alde zeharkatu zituzten, milaka pertsonatik gora batuta, ondoren Telletxe plaza kolorez morez janzteko. Eskualdeko gainontzeko udalerri nagusietan ere mobilizazioak egon ziren, askotariko emakumeen arteko sareak osatzeko borondatea argi utzita. "Konplizitateak ehuntzen ditugu, sistemaren kontra konspiratu eta horri eraso egiteko", adierazi zuten atzo, "dena aldatu nahi dugu, eta horretan gaude! Patriarkatua arrakalatzen ari gara".
Ehunka pertsonak “dena aldatzeko” eta “sistema arrakalatzeko” deia egin dute #Algorta erdigunean. #GoraBorrokaFeminista #UKmartxoak8 #Getxo pic.twitter.com/Fy83gcvNUZ
— Hiruka (@HirukaEus) March 8, 2021
Komunitatea eta zaintza kolektiboa aldarrikatu zituzten atzo kalera irten ziren milaka feministek. Leioan zaintza-sareen beharra mahaigaineratu zuten, hori delakoan benetako zaintza, "eta ez saldu nahi digutena, eredu indibidualista, gizarte-rolean eta gazteen kriminalizazioan oinarrituta dagoena". Algortan batutakoek ere, ildo horretan, sistema osoa zalantzan jarri zuten, "mendekotasun- eta botere-egitura baita". Horren aurrean, ozen oihukatu zuten planto egingo diotela "bizitza kolapsatzen duen sistema heteropatriarkal, arrazista, kapitalista, kolonialista eta kapazista honi". Denok bizitza duina erdiesteko borrokan segituko dutela aldarrikatu zuten, eta, hori lortu artean, kalean jarraituko dutela iragarri zuten.
