Erasoen aurrean, autodefentsa transmaribibolloa aldarrikatu dute

Atzoko elkarretaratzearen irudia. © UKATU

Maiatzaren 17an, transfobia, lesbofobia, bifobia eta homofobiaren aurkako eguna aldarrikatzen da munduan. Hori horrela, elkarretaratzea egin zuten atzo dozenaka lagunek Algortako Telletxe plazan. Hala ere, oraingoan, adierazi zutenez, ez ziren bertan batu biktimaren papera betetzera, "ez gatoz inoren babesaren eske", eta azaldu zuten antolatuta daudela eraso LGTBIQ-foboakaz amaitzeko: "Heteroaraua suntsitu nahi dugu; sistema hau irauli nahi dugu".

Duela 31 urteko maiatzaren 17an, homosexualitatea buruko gaixotasunen zerrendatik kanpo utzi zuen Munduko Osasun Erakundeak. Hori dela eta, harez geroztik, urtez urte, egun horretan, transfobia, lesbofobia, bifobia eta homofobiaren aurkako eguna aldarrikatzen da munduan. Transexualitatea, berriz, 2018an atera zuten zerrenda horretatik. 

Hori dena gogoan hartuta, Ukatu Transmaribibollo Asanblada uribekostarrak elkarretaratzea egin zuen atzo, astelehenean, Algortako Telletxe plazan. Bertan deitoratu zutenez, sexu-joera eta -identitateak apurka medikuntza eta psikiatriaren diagnosietatik ateratzen doazen arren, heterosexualak ez diren pertsonek egiturazko indarkeria bati aurre egin behar izaten diote. "Gure gorputz, praktika, identitate eta desirak heteroarautik kanpo kokatzen diren heinean, zapalduak dira. Hetereoaraua botere harreman multzoa da, eta, horren bidez, gure jendartean sexualtasuna normaldu eta arautu egiten da. Harreman heterosexual idealizatuak instituzionalizatu dira, eta gizakia izateak esan nahi duenarekin parekatu da". Hau da, azaldu zutenez, heterosexualitatea sexualtasun "normal, natural eta onartu bakarra" izatea inposatu duen gizarte eta kultura erregimena da heteroaraua: "Jendarte honek desira heterosexuala produzitzen du etengabe. Eta horren ondorio dira hemen salatzera gatozen lesbofobia, transfobia, homofobia eta bifobia".

Horrez gainera, aitortu zuten azkenengo urtean aurrerapauso handiak eman direla, baina beste batzuk oraindino lortzeke daudela, berbarako gaur, martitzenean, Espainiako Kongresuan eztabaidatuko duten Trans Legea. Hala ere, atzoko elkarretaratzea ez zuten biktimaren papera betetzeko egin, ez dutelako inoren babesa eskatu gura: "Antolatuta gaude. Eta argi dugu eraso LGTBIQ-foboekin amaitzeko gakoa heteroaraua suntsitzea dela, sistema hau iraultzea, alegia". Hori dela eta, erasoen aurrean, autodefentsa transmaribibolloa aldarrikatu zuten atzo.

Erlazionatuak

Uribe Kostako Asanblada Transmaribibolloa sortuko dute, "gure borrokaren merkantilizazioari aurre egiteko"

Uribe Kosta

Ekainaren 13an, Larrabasterrako Plaza Beltza Kulturgunean, 20:00etan. Horiexek dira Uribe Kostako Asanblada Transmaribibolloa sortzeko deialdiaren ...
"Trans Legea transexualen kolektiboaren aldarrikapen historikoa da"

Uribe Kosta

Uribe Kostako sexu-genero disidenteak eta mugimendu feministaren gehiengoak espainiar Estatuak proposatutako Trans Legearen aldeko eta eraso tran...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun