Espetxe Zuzendaritzak eta Lakuako Gobernuko Berdintasun, Justizia eta Gizarte Politiketako Sailak, administrazio bakoitzaren eskumenen esparruan, zazpi euskal preso Euskal Herriko espetxeetara eramatea erabaki dute, tartean Uribe Kostako hiru. Hala, Eusko Jaurlaritzak erabakiko du orain bakoitza zein espetxetara mugituko duten: Zaballa (Araba), Basauri (Bizkaia) edo Martutene (Donostia).
Pedro Cano eta Arkaitz Goikoetxea Logroñoko espetxetik, Joseba Segurola eta Gregorio Vicario Burgosetik, Gorka Martinez El Duesotik eta Maria Lizarraga eta Iñigo Gutierrez Aranjuezetik. Azken bi horiek Izadiren gurasoak dira; urtarrilaren 23an hiru urte beteko ditu umeak eta gurasoengandik bananduko dute.
Gutierrezek 2022ko uztailean amaituko du zigorra, eta daborduko hiru laurden baino gehiago bete dituenez, baldintzapeko askatasunean egon beharko luke aspaldi. Espainiako Barne Ministerioak dioenez, hirugarren gradura igarotzea ere ebatzi da eta kartzelatik atera beharko litzateke laster.
