Irizar Taldeko zuzendaritzak enplegu-erregulazioko espedientea (EEE) aurkeztu du Alconzak Berangon duen lantegirako, eta horrek langile-taldearen % 40a kaleratzea ekarriko luke, hau da, 38 pertsona. Horren aurrean, eta enpresak lantegi berangoztarra 2013an erosi zuenetik egindako "kudeaketa negargarria" salatzeko, beharginek makinak gelditu eta greba mugagabeari ekin zioten joan den astelehenean: "Borroka da dugun aukera bakarra".
Atzo, Areetan eta Negurin egindako manifestazioan euren aldarriak ozen zabaldu zituzten "enpresaburu diruzaleek" entzun zitzaten, eta salatu zuten zuzendaritzaren utzikeriak eraman duela lantegia egoera horretara.: "Haien ondorioak ez ditugu betikoak ordaindu nahi, Alconzan ez dago inor soberan!".
Egungo zein etorkizuneko lanpostuak bermatuko dituen industria-plana aldarrikatu dute #Alconza-ko langileek.
— Iker Rincon (@irincon_) March 3, 2022
Hori lortzeko aukera bakarra borroka dela azpimarratu dute. pic.twitter.com/TEovOWLmdx
Gaur gaurkoz, azaldu dute Irizar Taldeko zuzendaritzak ez duela langileakaz negoziatu gura izan eta, horren aurrean, langileek exijitu dute aurkeztutako EEE-a bazter batean uztea eta lantegiaren bideragarritasuna bermatuko duen industria-plan bat osatzea.
Bitartean, herritarrei dei egin diete euren borrokagaz bat egiteko, eta iragarri dute hurrengo manifestazioa martxoaren 12an egingo dutela, Berangoko udaletxean, 18:00etan.
Argazki-galeria
