Euskaraldian parte hartzeko izena emateko epea zabaldu dute

Bilboko Kafe Antzokiko ospakizun ekitaldira hurbildu ziren arduradunen eta ordezkarien talde-argazkia. © EUSKARALDIA

Aurten, azaroaren 18tik abenduaren 2ra izango da Euskaraldia, eta daborduko ahobizi edo belarriprest roletan parte hartu gura duten herritarrek eman dezakete izena Euskaraldiaren webgunean. Aurreko edizioetan izena eman zutenek, parte hartzea berretsi baino ez dute egin beharko. Atzo Bilbon egindako aurkezpenean, antolatzaileek azaldu zutenez, "beste behin ere, lortu nahi dugu herritarren hizkuntza ohituretan eta praktika linguistikoetan euskarak gero eta leku zabalagoa izan dezan”.

Hilabete bi baino gutxiago falta da Euskaraldiaren hirugarren edizioari hasiera emateko, eta, atzotik, eguaztenetik, aurrera dute herritarrek ariketan izena emateko aukera. Hala, ahobizi eta belarriprest rolak hartu gura dutenek, Euskaraldia bera hasi arte izango dute horretarako aukera; aurten, ordea, aurreko edizioetan izena eman zutenek, parte hartzea berretsi baino ez dute egin beharko.

Atzoko agerraldian jakinarazi zutenez, orain hasi eta ariketa bukatzen den arte Euskaraldian parte hartuko duten belarriprest eta ahobiziei informazioa eta aholkuak ematen jardungo dute ekimena antolatzen ari diren herri batzorde eta koordinazioko kideek. Izan ere, “belarriprest eta ahobizi guztiek ariketa ahalik eta modu prestatu eta erosoenean” egitea gura dute.

Entitateetan ariguneak osatzeko aukera ere, zabalik

Maiatzean ireki zuten entitateek ariguneak osatu eta ariketan izena emateko aukera eta, azpimarratu zutenez, oraindino ere, urriaren 31ra arte, mota guztietako entitateek, hala nola denda, elkarte, kirol-talde, enpresa edota erakunde, aukera izango dute ariguneak identifikatu eta Euskaraldian talde moduan parte hartzeko.

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun