Aurtengo Frantziako Tourraren lehenengo etapak Uribe Kosta zeharkatuko du alderik alde. Hori dela eta, Gure Eskuk, bere aldarriak nazioartean entzunarazteko asmoz, kirol-probaren ibilbidea ikurrinez betetzeko deia egin du.
Tourra Erandiotik sartuko da eskualdera, eta erabakitzeko eskubidearen aldeko taldeak eguerdiko 12:00etan jarri du ikurrinakaz ateratzeko lehenengo hitzordua Erandiogoikoko Kateako biribilgunean. Ordubete beranduago, 13:00etan, Akarlandan, unibertsitateko errotondan eta Astrabuduko Axpe inguruan egoteko hitzorduak jarri dituzte.
Leioan, bere aldetik, Lamiako-Txopoeta Bizirik auzo-mugimenduagaz bat egin eta itsasadarraren ondoko errepidean batzeko deia egin dute, 11:35etatik aurrera. Kasu horretan, Gure Eskuko aldarriakaz batera, auzo horretako arazoak ozen entzunaraziko dituzte leioaztarrek.
Getxon, berriz, 11:00etatik 13:00etara ikurrinak eskutan egoteko deialdi bi egin dituzte: Areetan, Bizkaia Zubian, eta Algortan, Ollarretxe eta Salsidu arteko biribilgunean, Piruleta gozoki-denda parean. Banderakaz agertzeaz gainera, Bizkaia Zubian "Euskal Herriak erabaki" mezua daraman 30 metroko luzera duen pankarta handia jarriko dute.
Berangora 13:43ak aldera helduko da tropela, baina berangoztarrak 12:00etatik egongo dira zain Simon Otxandategin ikurrinak eskutan.
Sopelan, aldiz, Tourrak udalerritik egiten duen ibilbidean ikurrinakaz egoteko deia egin dute, 13:00etatik aurrera.
Plentzian, 12:30etik 14:30era batuko dira Paulina aldapan, eta, gainera, Errotabarri futbol-zelaian ikurrin erraldoia eta Nafarroako bandera zabalduko dituzte.
Horrez gainera, balkoietan Euskal Herriko banderak jartzeko deialdia egin du Gure Eskuk.
