Bilakaera meteorologikoa aztergai

"Urtero gero eta muturreko egoera gehiago bizitzen ari gara, eta biziko ditugu"

Iker Torre Navarro · Ander Zarraga 2023ko aza. 17a, 13:20

EITBko Eguraldia saioko meteorologoa eta zuzendaria da Zuriñe Zulaika fisikaria, eta programa horretako aurkezlea June Ansoleaga kazetaria. Azaldu dutenez, Euskal Herriko kliman aldaketak ematen ari direla agerikoa da; horren adibide bezala, adierazi dute 2023ko urria inoizko beroena izan dela, hemen ez ezik, mundu osoan. Kazetari sopeloztarragaz eta fisikari getxoztarragaz elkartu da HIRUKA eguraldiaren aldaketa horien inguruan gehiago jakiteko. 

Hasteko, Ansoleagak berretsi du titular gero eta deigarriagoak ari direla ematen, bai hainbat marka klimatologiko hausten ari direlako bai gero eta fenomeno muturrekoagoak gertatzen direlako ere. Zulaikak datu kezkagarri bategaz borobildu du baieztapen hori: "Copernicusen informeak aipatu du aurtengo urria inoizko beroena izan dela, ohi baino 0,85 gradu gorago kokatu da termometroa mundu mailan eta 1,3 gorago Europan".

Zulaikaren esanetan, ekaitz handiak eta uholdeak bezalako fenomenoak beti gertatu izan dira gurean, "baina egia da mundu-mailan tenperaturaren igoerarekin batera, atmosferan dagoen hezetasuna handitu egingo dela eta horrek muturreko egoera gehiago ekarriko dituela". Ansoleagak hori berretsi du eta Nafarroako kasua aipatu du, non datuek adierazten duten 1950. hamarkadatik gero gutxiago egiten duela euria: "Muturreko egoeren kopurua areagotu egin da, hau da, egun askotan egiten du euri asko, eta lehengo zirimiri hori gero eta gutxiago dugula nabaritu dugu".

Tenperatura altu horiek, gainera, baso-suteak eta lehorteak ere eragin ditzakete, eta kazetari sopeloztarrak ohartarazi duenez, "gero eta muturreko egoera gehiago bizitzen ari gara, eta biziko ditugu, honek ez baitu atzera egingo".

Bukatzeko, biek azpimarratu dute gizakiak eragindako kutsaduran dela klima aldaketa horren atzean dagoen arrazoi nagusietako bat, eta, orain artekoa leheneratu ezin daitekeen arren, etorkizunera begira hainbat neurri hartu beharko genituzkeela. "Egoera kezkagarria dela argi dago, mundu mailan esaten ari den gauza bat da. Esate baterako, Munduko Meteorologia Agentziak esan du kutsadura maila jaisten ez baldin bada, datozen urteak gero eta beroagoak izango direla, eta horrek muturreko egoera gehiago eragingo dituela gure egunerokotasunean; eta Euskal Herrian ere hasi gara aldaketa horiek nabaritzen", ohartarazi du Ansoleagak.

Erlazionatuak

Klima Mediterraneoa, Uribe Kostan?

Iker Rincon Moreno 2023 aza 17 Uribe Kosta

Aldaketarik nabaritu al duzu eguraldian azken urteotan?

Aroa Sotelo Velasco · Nahia Martinez Gondra 2023 aza 17 Erandio

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun