"Akabuko aldian, eguraldia gero eta estremistagoa da". "Eguraldiari so bizi gara, eta urarekiko gero eta menpekoagoak gara". Horiexek dira Lander Labajo eta Gabriela Frances Uribe Kostako laborarien hitzak, hurrenez hurren. Izan ere, azken urte bietako udak ohi baino beroagoak izan dira, euri-egun gutxikoak; hitz bakarrean: ezohikoak. Hartara, denon ahotan egon den gai bat izan da eguraldia, eta halaxe ondorioztatu du oraintsu ere Copernicus (C3S) Europar Batasunak klima aldaketa aztertzeko zerbitzuak. Horrek ohartarazi du inoiz neurtu den urterik beroena izan zela iazkoa munduan, eta ez bakarrik udan. Industriaurreko datuakaz alderatuta, emandako datuen arabera, batez beste ia 1,5 gradu berotu zen planeta 2023an, eta igoera hori orokortua izan zen urte osoan. Baina, zer-nolako eragina izan du tenperaturaren igoera horrek, eta eguraldiak orokorrean, gure landa-eremuan?