Manifestazioa Arriaga plazatik abiatu eta Aldundiaren egoitzaren aurrean amaitu zen. Bertaratutakoek "Subflubiala geldituko dugu!" bezalako aldarrikapenak oihukatu zituzten; izan ere, plataformatik salatu zutenez, 500 milioi euro baino gehiagoko balioa duen obra horrek "ingurumen-helburuen kontrako norabidean doa", eta Bilboko metropolialdean garraioaren azterketa integralik egin gabe diseinatu dute.
Halaber, proiektuaren ingurumen-inpaktuaren adierazpenean jasotako datu ofizialen arabera, 2048an trafikoa % 33 handituko litzateke. "Erakundeek garraio publikoaren aldeko apustua egin behar dute, autobiak eraikitzen jarraitu beharrean", azpimarratu zuten Subflubiala EZ! taldeko bozeramaileek. Gainera, proiektuaren kostua izugarri igo daitekeela kritikatu zuten, Supersurragaz gertatu zen bezala, eta funts horiek garraio publikoaren sarea hobetzeko erabiltzea eskatu zuten.
