Hitzaldian, Bizkaiko Foru Aldundiak Getxo eta Portugalete itsasadarraren azpitik lotzeko egin gura duen tunelaren eraikuntza-prozesuak eta ondorengo trafikoak izango dituen eragin larriak salatu zituela azaldu du Ibañezek. "Trafikoak osasunean duen eraginari buruzko hainbat azterlan argitaratu dira, eta, horien arabera, kutsadura mota hori duen eremu batean hiru urtez bizitzeak asko areagotzen du biriketako minbizia eta beste gaixotasun batzuk izateko aukera, erretzailea izan ez arren", azpimarratu du Ibañezek.
Mediku ohiak aipatutako beste hainbat adibideren artean, Urola Garaian (Gipuzkoa) egindako ikerketa baten adibidea ekarri du. Horretan, haurdun zeuden emakumeek arnasten zuten kutsadura maila neurtu zuela, eta horien seme-alaben garapen neurologikoari eragina zuela antzeman ei zuten. "Hain zuzen ere, ume horietan haurdunaldian erre zuten amen seme-alaben ondorio berak ikusi zituzten", nabarmendu du.
"Gainera, umeak dira partikula kaltegarri horiek gehien arnasten dituztenak, bai txikienak izanda proportzionalki partikula kutsakor gehien arnasten dutelako, baina baita lurretik hurbilen bizi direnak direlako ere, partikula horiek airean esekita daudelako eta lurretik hurbil pilatzen direlako", esplikatu du Muskizekoak.
Itsasadarreko tunelaren eragina
Mehatzaldea Bizirikeko ekintzaileak Aldundiak egin gura duen azpiegituraren obrek Artaza-Romo Institutuan izango duten eragina "izugarria" izango dela deitoratu du. Berbarako, institutua tunelarentzako proiektatutako sarbideetako baten ondoan egongo da, eta, "zazpi urtez, 570 ikasle zarata, bibrazio eta aire kutsatua duen ingurune batean egongo dira", ohartarazi du. Aldundiak eta Hezkuntza Sailak ikastetxeko leihoak berrituko dituztela iragarri badute ere, Ibañezek uste du neurri horiek ez direla nahikoak: "Ez da zarata kontua bakarrik, lanek sortuko dituzten partikula esekiak osasun-arazo larria izango dira, aipatu gabe umeak zentroak itxita egon beharko direla ez dutelako patiorik izango".
Ingurumen-inpaktua ere kezkagarria da bere ustez: "Proiektuak tunelaren sarreran horma handi bat egitea eta berdeguneak galtzea aurreikusten du. Bizilagunek kutsadura, zarata eta ingurunearen suntsipena jasango dute". Gainera, adierazi du tuneleko trafikoaren kutsadura ez dela horren barruan geratuko, baizik eta sakabanatu egingo dela, Getxoko eta Portugaleteko sarbideetako eremuei kalte eginez. "Eskala handiko arazoa izango da, eta ez dira inpaktua behar bezala neurtzen ari", erantsi du.
Mugikortasun-eredua
Ibañezek zalantzan jarri du baita azpiegitura horrek printzipioz izango duen 600 milioi euroko inbertsio horren koherentzia. Bere hitzetan, hiri handietan ibilgailu pribatuaren erabilera gero eta gehiago murrizten ari diren bitartean, eta deskarbonizazioaren alde egiten ari diren bitartean, ibilgailu pribatua sustatzen duen horrelako azpiegitura erraldoi bat egiteak ez du zentzurik: "Hiri asko emisio txikiko eremuen aldeko apustua egiten ari dira. 2035ean errekuntza-autoak fabrikatzeari utziko badiote, zer zentzu du orain azpiegitura hori eraikitzeak?".
Era berean, etorkizunera begira, bere iritziz mundu guztiak ezin izango du auto elektriko bat erosi, "beraz, zirkulatzen jarraituko dutenak gero eta zaharragoak eta kutsatzaileagoak izango dira". Gainera, azpimarratu du mugikortasun-arazoak konpontzeko kontraesana dela trafiko pribatua sustatzea, garraio publikoaren eskaintza hobetzea izan beharko balitzateke inbertsioen lehentasuna. "Kontua ez da autoentzako azpiegitura gehiago eraikitzea, jendearen beharrei benetan erantzungo dien garraio publikoko sistema batean inbertitzea baizik".