Domekan, 10:30ean Portugaleteko udaletxetik abiatuko den bizikleta-martxa plataformak antolatuko duen bigarrena izango da, eta bere ibilbidean itsasadarreko udalerri nagusi batzuk zeharkatuko ditu, hala nola Barakaldo, Bilbo, Leioa eta Getxo. Horregaz batera, 11:55ean, protesta egiteko geldialdia egingo dute Bizkaiko Foru Aldundiaren Bilboko egoitzan. Martxa Artatzako parkean bukatuko da, tunelaren obrek hartuko duten berdegunean, hain zuzen ere.
Martxa luzeagaz batera, txiki-martxa ere egingo dute 12:40ean. Hori Leioako metro-geltokitik abiatuko da, mobilizazio nagusiagaz bat eginez.
Hauek dira protesta egiteko deia zabaldu dutenek azpiegituraren aurka plazaratu dituzten argudio nagusiak: itsasadarraren azpiko tunelak trafiko pribatua sustatuko du, EBren eta EAEko administrazioen konpromiso klimatikoen aurka eginez; mugikortasunari buruzko azterketa zehatzik gabeko milioika euro xahutuko dituen proiektua da; Artatza parkea eta Ballonti ibarra sakrifizio-eremuak bilakatuko dituzte; plangintza integralik ez duen egitasmoa da, ez baitu metropoli-estrategiarik eta zaharkitutako azpiegitura bat lehenesten duelako, eta, azkenik, "ingurumen-iruzurra egiten ari direlako", hasiera batean ingurumen ebaluazio azterketak baztertutako leherketak eta Ballontiko zubibidea berriro ere txertatu dituztelako lanetan.
Hori guztia kontuan hartuta, zera adierazi dute plataformako kideek: "Itsasadarraren azpikoa, elefante zuria da, gure etorkizuna hipotekatzen duena. Benetako alternatibak eskatzen ditugu: auto gutxiago, garraio publiko gehiago eta natur-guneak babestea".
