"Oro har, eskualdean erantzuna oso ona izan da", adierazi du LAB Eskuinaldea sindikatuko Iraide Juaristik. "Esanguratsua da Leioako Unilever lantegiko produkzioa % 90 eten dela; izan ere, industrian eta hezkuntza lanuzteek arrakasta nabarmena izan dute". Erantsi duenez, jarraipena apalagoa izan da administrazioa bezalako beste sektore batzuetan.
Greba-eguna goizean goizetik hasi zen, eskualdeko hainbat puntutan lanera zihoazen herritarrak informatzeko egon ziren piketeakaz. Pikete horiek gainera errepideetako trafikoa moteltzeko ekintzak ere egin zituzten, hala nola Artatzako suhiltzaileen parketik Avanzadatik zehar joan zen martxa motela edo errepideetan beste hainbat ekintza. Juaristik baieztatu duenez, Algortan eta Plentzian Ertzaintzak hainbat pertsona identifikatu zituen. Piketeak herrietako dendetara ere joan ziren greba-egunaren berri emateko eta horretara batu zitezen animatzeko.
Horren ondoren, Bilbon egin zuten manifestaziora joateko deia egin zuten eskualdetik, baina, arrastian, deialdiak ere egin zituzten herriz herri. LABeko ordezkariak azaldu duenez, 800 pertsona inguru bildu ziren Algortan egindako mobilizazioan, 150 Erandion, 100 Leioan eta 150 Gorliz-Plentzian.
Juaristik azpimarratu duenez, greba honek frogatu du jendea badagoela gutxieneko soldata duin baten alde mobilizatzeko: "Gai honek herritarrentzat garrantzi handia duela frogatu dugu, geroz eta kezka handiagoa baitago langileen pobretzearen inguruan". Horrez gain, aldez aurretik egindako lanketa ere "izugarria" izan dela azpimarratu du LABekoak, herriz herri komiteak sortu baitituzte eta horren emaitza izan direla egun osoko egitarauak.
