Jendez lepo zegoen Sopelako pilotalekuan Euskal Herritik Mundura AMPO Txapelketako pala finalak jokatu zituzten zapatu arrastian. Batetik, norgehiagokarik parekatuena Larruzko Paletako finala izan zen. Landeta eta Ibai Perez txapeldun izan ziren Madariaga eta Sierra hiru jokotan menderatuta: 14-15, 15-12 eta 8-10. Lehen jokoan, aurkariak aurretik joan arren, bikote berdeak azken tantoetan irauli zuen markagailua; bigarrenean, berriz, Madariaga eta Sierra suspertu eta finala hirugarren joko erabakigarrira eramatea lortu zuten.
Azken jokoan maila bikaina erakutsi zuten bikote biek, eta tanto ikusgarriek harmailak zutik jarri zituen tarteka. Seina berdindu ondoren, Landeta eta Ibai Perez 6-9 aurreratu ziren; aurkariek azken ahalegina egin arren, 8-10 itxi zuten jokoa eta txapela eskuratu.
Bestetik, txapelketako bigarren finalean, Pala Motzekoan, Gaubeka eta Gordon nagusitu ziren Zubiri eta Olazabalen aurka bi jokotan: 15-7 eta 15-11. Partida 6-4 zegoela, Erik Zubirik bularraldean ziztada sentitu du eta, hortik aurrera, ezker eskuz jokatu behar izan zuen ia dena; egoera horrek baldintzatu zuen neurri batean lehia, eta Gaubekak eta Gordonek partidaren kontrola hartu zuten. Bigarren jokoan ere Zubirik eta Olazabalek ahalegin handia egin zuten, baina une erabakigarrietan sendoago aritu zen bikote irabazlea.
