Gaur hasten dira, Leitzan (Nafarroa), Euskal Herriko Bollotopaketak: bollera subjektu politikoa erdigunean jartzea bilatzen duten jardunaldiek aste-akabu osoa iraungo dute, apirilaren 26tik 28ra. Uribe Kostako UKatu sexu-genero disidenteen asanbladatik ere deialdia egin dute 40 urte baino gehiago dituen topaketetara joateko; hala, euren hausnarketak partekatu dituzte egungo bollera subjektuaren identitateaz, baita sexu-genero identitateen beharrez ere.

Atzo, eguenean, izan zen apirileko ohiko osoko bilkura Getxon. Horretan, hainbat ebazpenen berri eman zuten, hala nola aurrekontua gehigarrizko kredituz handitzea. Horretarako, iazko soberakinetik 35 milioi euro bideratuko dituzte, eta, horrela, 165 milioi euro izango ditu aurtengo aurrekontuak. Ondoren, mozioen kapituluak hartu zuen protagonismoa, baita udalerrian lorezaintza-lanez arduratzen den enpresako eta greban dauden langileen ordezkarien protesta ere.