Beste behin ere, Berangoko Alconza lantegiko jabetza duen Irizar Taldeak uko egin dio enpresa batzordeagaz batzeari. Atzo, martxoaren 30ean, berangoztarrak Ormaiztegira (Gipuzkoa) joan ziren Irizarreko zuzendaritza batzordeari eta Kontseilu Sozialari formalki bilera bat eskatzera. Horretarako, gutun bat helarazi gura izan zieten arduradunei, "baina ez dituzte ezta gutunak jaso nahi izan", salatu dute langileek.
Horren aurrean, Alconzako enpresa batzordeak Irizarren jarrera salatu du berriro ere: "Larria iruditzen zaigu langileokin biltzeari uko egitea. Argi geratu da, langileok zubiak eraiki nahi ditugun bitartean, beste aldeak zubi horiek dinamitatzen dituztela".
Irizar Taldeak enplegu erregulazio-espediente (EEE) bat ezarri gura du Berangoko Alconza lantegian eta, ondorioz, 38 langile kaleratze-arriskuan daude. Beharginek behin eta berriro eskatu diote zuzendaritzari eurakaz biltzeko nahia dutela, egoeraz eta konponbideaz aritzeko. Halere, arduradunek "inoiz" ez diote erantzunik eman eskaera horri, deitoratu dute langileek.
