Atzo, 13:00etan, Bilboko udaletxearen parean izandako kontzentrazioan ez ezik, Astrabuduko manifestazio zaratatsuan ere parte hartu zuten Joseba Goikouria alkate erandioztarrak eta bertoko talde politikoetako ordezkariek.
Hain zuzen ere, goizean adierazpen bat onartu zuen Erandioko Udaleko Bozeramaileen Batzordeak, talde denen babesagaz. "Emakumeen aurkako indarkeriaren aurrean isilik ez geratzeko eta ez onartzeko" eskatu zieten alderdiek herritarrei. "Indarkeria matxista egoera deitoragarri baten ondorioz emakumea tragikoki" hil dutela gaitzetsi zuten. Era berean, atsekabea azaldu zuen Bozeramaileen Batzordeak, eta gertakari ulergaitza dela esan zuen. Halaber, elkartasuna adierazi zieten biktimaren gertukoei.
"Emakumeen aurkako erasoak segurtasun fisikoaren eta moralaren kontrako erasoak dira, eta baita emakumeen duintasunaren aurkako erasoak ere. Ondorioz, giza eskubideen urraketa larri eta onartezina da, eta salatu egin behar da, ez onartuz, isilik ez geratuz eta biktimei babesa emanez", erantsi zuten.
Gertaerak
Astrabuduko Mezo kaleko etxebizitza batean aurkitu zuten herenegun, astelehena, 39 urteko emakume bilbotar baten gorpua, indarkeria zantzu argiakaz. Senideek domekan aurkeztu zuten andrea desagertu izanaren salaketa. Horren arabera, zapatu arrastitik falta zen etxetik. Hain justu, bilatzeari ekin diotenean aurkitu zuten emakumezkoaren gorpua.
Hilotza topatu ostean, bikotekidearen bila hasi zen Ertzaintza, hilketaren susmagarri nagusia zelakoan; gizonezkoa gorpua agertutako etxean bizi da, bere amagaz. 38 urteko astrabuduarra astelehenean bertan atxilotu zuten, arrastian, Leioako Unbe mendiko Akarlanda parkean.
