Udal-hauteskundeak 2019

Merkatari-elkarteentzako laguntzak bikoiztu gura ditu PPk

Argazkia: ALTERIO FELINES

Erandioko merkataritza txikia sustatzearen alde agertu da Susana de Cos Alderdi Popularren alkategaia. Hala, hauteskundeak irabaztekotan diru-laguntzak handitu eta zenbait zerga ere diru publikoz ordainduko dituztela adierazi du De Cosek.

Hurbileko merkataritzaren etorkizuna zalantzazkoa dela uste du Susana de Cos hautagai popularrak, "kontsumitzaileen erosketa-ohitura berriak, merkataritza elektronikoaren gorakada eta on-line denak direla eta". Horregatik, Erandioko dendek bizirauteko eta gehiago zabaltzeko erraztasunak eman beharra dagoela adierazi du alkategaiak.

Ildo horretan, merkatari-elkarteentzako diru-laguntzak bikoizteko promesa egin du De Cosek. Modu berean, Obren gaineko Zerga, Irekitze-Lizentziarena eta Zabor Bilketarena ordaintzeko diru publikoa ipiniko duela iragarri du. Ez du argitu zerga horiek osorik ordainduko lituzkeen, edo zati bat.

Segurtasunaz ere berba egin du Susana de Cosek. Kaleetan polizia gehiago egoteko eta Astrabuduan Udaltzaingoaren azpi-komisaria bat zabaltzeko nahia azaldu du, besteak beste.

Enpleguari dagokionez, hura sustatzeko erakundeen eta sektore pribatuaren arteko lankidetzaren beharra azpimarratu du. Zehazki, Erandioko Udala, enpresak eta unibertsitatea batuko dituen egitura juridiko bat sortzeko proposatu du.

Erlazionatuak

Udal-hauteskundeei begira: sigla-zopak, langabezia eta aparkalekuen arazo zaharra

Erandio

Getxoren ostean, Uribe Kostan hautagaitza gehien duen udala da Erandio: bederatzi. Alkategaien artean aurpegi berriak dira gehienak, eta segurua da...
Udal-zergak eta tasak jaitsi gura ditu PPk

Erandio

"Erandion zerga gehiago ordaintzen da beste udaletan baino", Susana de Cos PPren alkategaiaren berbetan. Legearen barruan zergak jaitsi daitezkeela...