Azti Itsas eta Elikagaien Ikerketarako Euskal Zentroak iragarri duenez, aste honetan, hilaren 17tik 20ra, izango diren marea biziak "bereziki handiak izatea aurreikusten da". Fenomeno honek ohikoak ez diren irudia utziko du kostaldean, itsasbeheran normalean estalita dauden zonaldeak lehorrean geratuko baitira.
Hala ere, fenomeno horrek bestelako alde desatsegina ere izan ohi du, urak gainezka egin baitezake itsasadarreko hainbat gunetan. Hori da hain zuzen ere Erandioko Altzaga auzoko bizilagun askoren artean kezka sortzen duena, beldur baitira martxoak hainbat kalte eragin zituen uholdeak ez ote diren errepikatuko.
Besteak beste, sare sozialetan, Erandioko Auzokideok Erandio Bizirik plataformak salatu du agintariek beraien ardurei uko egin dietela, eta uholdeei aurre egiteko neurriak hartu beharrean zakuak besterik ez dituztela banatu.
"Erakundeek, Foru Aldundia buru dutela, ez diete kasurik egiten kaltetutako pertsonei, eta erantzukizunak saihesten dituzte. Segurtasun ezaren maila Aldundiak kaiko defentsak desegin eta martxoan uholdeak gertatu eta hurrengo eguneko berbera da", adierazi dute.
Espero da martitzen eta bariku arteko itsasgorak 4,8 eta 5 metro ingurukoak izatean. Eguaztenean, itsasgora 5,04 metroraino heldu daitekeela ere ohartarazi dute. Mareak biziak 14 egunean behin gertatzen dira, Lurra, ilargia eta eguzkia lerrokatzen direnean. Horiek bereziki nabarmenak dira urrian irailean eta urrian eta otsailean eta martxoan.
