Tosuko borroka, gogoan

Genaratxun landatutako zuhaitzaren ondoan egin zuten atzo ekitaldia. © TOSU BETIRAKO

Tosu landa izenagaz ezaguna den gunean aparkaleku bat eraikitzearen kontrako mugimendua abiatu zenetik 8 urte igaro dira. Urteotan askotariko erresistentzia saiakerak egin dira, 2017ko urrian landan zegoen kanpalekua hustu eta obrak abiatu zirenera arte. Zortzi urteotako borroka omentzeko ekitaldia egin zuten atzo, domekan, Algortako Portu Zaharrean.

2011n abiatutako borroka hori gogoratu guran, ekitaldia eta triki-poteoa antolatu zuen atzo, domekan, Tosu Betirako plataformak. "Orain urrun geratzen den 2011n hasi zen gure ibilbidea zoro batzuk Tosuko landa okupatu zutenean. Geroztik, eta hamaika ekimenen bitartez, asko hazi gara, ez bakarrik maila politikoan, baita pertsonalean ere", azaldu dute ekologistek.

Hala, Portu Zaharreko jaiak aprobetxatuz, dozenaka lagun batu ziren atzo trikiti eta panderoaren doinuak lagunduta, Genaratxuko parkera joateko. Bertan, 2017an Tosuko landatik berreskuratutako okarondoa landatuta dago, eta horren magalean egin zuten ekitalditxoa. Gogoratu dutenez, 2017ko abenduaren 16an 200 lagun inguru martxa egin zuten Bidezabaletik Tosu landara arte, bertan egiten ari diren aparkalekuaren obrak salatzeko asmoz. Martxa horretan, obren ingurura heldutakoan, hondeamakinek botatako zuhaitz bat hartu eta, Algorta osoa zeharkatu ondoren, Batzokian utzi zuten alkatearentzako "gabonetako opari" gisa. Ondoren, zuhaitz hori berreskuratu eta Genaratxu parkean landatu zuten ekologistek.

Atzo egindako ekitaldiagaz zortzi urteotako borroka-zikloa "itxi" gura izan dute: "Indar eta denbora asko bidean utzi ditugu, baina askoz gehiago da lortu eta sortu duguna. Galdutako baina batez ere irabazitako guztiagatigatik, Tosu Betirako!".

Erlazionatuak

Parkinga, Tosun. Eztabaida askoren sortzailea

Erabiltzailearen aurpegia Getxo

Getxon, Andra Mari auzoan, Ibarbengoa metro-geltokiaren ondoan, hiru solairuko aparkalekua eraikitzeko obrak hasiko dira laster. Dragados S.A. eta ...
Tosu landako kanpalekua hustu dute eta lanak abiarazi dituzte

Getxo

Ertzaintza hurbildu da gaur goizeko 08:00ak aldera Getxoko Tosu landara. Aldi berean, parkinga egiteko Geocisa enpresako beharginak eremura sartu d...