Getxoko akuarioa ixteko "benetako arrazoiak" argitzea eskatu dute langile grebalariek

Gaur goizeko protestaldia Getxoko udaletxearen sarreran.

Gaur, eguenean, akuarioa ez ixteko elkarretaratze zaratatsua egin dute Getxoko udaletxearen atarian. Bitartean, Lan Harremanen Kontseiluan (LHK) azpiegitura hori ixteko erabakian inplikatutako alderdi denakaz premiazko bilera eskatu du ELA sindikatuak.

ELAk ezinbestekotzat jotzen du Getxo Aquarium-a ixteko benetako arrazoiak zeintzuk diren aztertzea; izan ere, egoera horren harira greban jarraitzen dute oraindino ere langileek. Hala, sindikatuak beharrezkoa ikusten du akuarioaren zerbitzua mantentzea ahalbidetzen duen edozein aukera aztertzea, orain arteko bost lanpostuak mantentzeagaz batera.

Grebalariek deitoratu dute abenduaren 11n, prentsa-ohar baten bidez, jakin zutela akuarioa 2020ko urtarrilaren 31n itxiko zela. "Osoko bilkuretan eta batzordeetan hainbat agerraldi egin ondoren, Getxoko Udalak jakinarazi zigun Bizkaiko Foru Aldundiak hartutako erabakiaren ondorioz hartu zutela itxieraren erabakia; hala ere, datu horrek kontraesanean jartzen du Aldundiak berak egun batzuk geroago esandakoarekin", deitoratu dute langileek.

Greban dauden beharginek azpimarratu dute akuarioa zerbitzu publikoa dela, "Getxoko udalerrian erreferente den aisialdirako eta kulturarako zerbitzua". Era berean, deitoratu dute Getxoko Udalak eta Aldundiak hartutako "aldebakarreko" erabakiak 5 lanpostu suntsituko dituela.

Horren denaren aurrean, ELAk premiazko bilera eskatu du LHKn akuarioa ixteko erabakian inplikatutako alderdi denakaz: Elena Unzueta (Iraunkortasun eta Ingurumeneko diputatua), Amaia Agirre (Getxoko Udaleko alkatea) eta Javier Sainz (Disetecmar SLko zuzendaria). Horren helburua da zerbitzua ixteko benetako arrazoiak argitzea.

Erlazionatuak

Getxoko akuarioa ixteko erabakia onetsi dute

Getxo

Getxo Aquarium zerbitzu publikoaren prestazioa etetea onetsi zuten atzoko osoko bilkuran, EAJren eta PSE-EEren aldeko botoakaz, PPren abstentzioaga...
Akuarioa ixtearen erabakia atzera bota dezala eskatu diote grebalariek Getxoko Udalari

Getxo

Greban dauden Getxo Aquariumeko langileak deitoratu dute prentsa-ohar baten bidez jakin dutela akuarioa ixteko udal-arduradunen erabakia. Horren au...
Getxoko akuarioa datorren urtarrilaren 31n ixtea proposatu du Gobernu-taldeak

Getxo

Datorren astelehenean, abenduaren 16an, izango den Lurralde Informazio Batzordean adostu beharko dute udal ordezkariek Getxo Aquariumeko zerbitzua ...
Getxo Aquariumeko langileak, hilabete greban

Getxo

Akuarioa kudeatzeko esleipena daraman enpresak (Disetecmar SL) langile bi kaleratu ditu (horietako bat ELA sindikatuko ordezkaria). Era berean, gre...