Elkarrizketak

"Aurtengo espedizioan ezin genuen segurtasuna bermatu"

Euskarabenturaren 2018ko edizioaren amaiera, Bizkaia Zubiaren ondoan. Euskal Herriko zazpi lurraldeetako eta diasporako 120 gaztek hartzen dute parte espedizioan.

Uztailean hirugarren edizioa egitekoa zuen Euskarabenturak, 16-17 urteko bitarteko gazte euskaldunentzako espedizioak. Tamalez, osasun-krisiak egitasmoa datorren urterako uztera behartu du, eta horren ordez, aisialdia euskaraz gozatzeko bestelako proposamenak egingo dituzte antolatzaileek, sare sozialen bitartez. Irune de la Maza ekimenaren koordinatzaileetako bategaz berba egin dugu aurtengo egoera bereziaz eta ekimenaren ezaugarriez.

Azkenean, bertan behera. Hala da.

Apirilean, denbora irabaztearren, erabaki genuen uztailean beharrean abuztuan egitea, baina ez genekien guztiz seguru egin ahal izango genuen ala ez. Maiatzaren bukaeran erabaki bat hartu behar genuen, antolaketa denborarekin egiteko. Gure lehentasuna espedizioa segurtasunez egitea izan da beti, eta kasu honetan ezin genuen hori bermatu, beraz, azkenik edizioa atzeratzea eta aurten ez egitea erabaki dugu.

Horrelako ekimen batek kontaktu fisikorik gabe zentzurik ez lukeela azaldu zenuten.

Bai, aisialdian egiten diren ekintza guztietan bezala, Euskarabenturan harremana sortzen da, familia bat ia. Talde handia gara eta distantzia soziala bermatzea oso zaila da, batetik; bestetik, ez du zentzurik horrela ibiltzeak, jendearen atzetik, distantzia batera egotera derrigortuz. Espedizioan sortzen den giroa hautsiko litzateke. 

Zer alternatiba eskainiko duzue?

Gazteen sare handiena gaur egun Instagramen dago, eta guk harreman asko dugu haiekin horren bitartez. Orduan, erronka birtual batzuk botako dizkiegu gazteei uztailean, Euskarabentura 2.0 izenarekin, eta sariak izango dituena. Bi eta bost lagun bitarteko taldeetan egiteko. Segurtasuna bermatuta egongo da, eta gazteak euren inguruan ibiliko dira.

Zergatik sortu zen Euskarabentura?

Elkartean dauden bizpahiruk Ruta Quetzalen parte hartu zuten, eta esan zuten: "Espedizio hau Euskal Herrira eraman behar dugu". Alde batetik gazte-talde bat sortzeko, azken batean gure etorkizuna baitira, bestetik Euskal Herria ezagutzeko, eta hirugarrenik kultura eta bizikidetza sustatzeko. Eta hori guztia euskaraz, euskararen inguruan eta euskarari indarra emanez. 

Euskara sustatzea lortzen da?

Bai. Parte hartzen duten gazteek galdetegi batzuei erantzuten diete euskararen erabileraren inguruan: bat espedizioa egin aurretik, horrela guk badakigu zer-nolako ingurutik datozen, zer hizkuntza-ohitura duten…; beste bat espedizioaren azken egunean, eta horren bidez neurtzen dugu zer aldaketa izan duten, izan badute; azkenik, sei hilabetera beste bat egiten diegu, hizkuntza-ohituretan eraginik izan ote dugun jakiteko. Horrez gain, espedizioan zehar erabileraren neurketa egiten da. Orain argitaratuko ditugu 2019ko espedizioko datuak, eta horietako bat da elkarrizketen %83 euskaraz egin zela. Pozik gaude datu horrekin.

Euskarabenturaren ibilbidea Maule eta Getxo artekoa da. Zergatik aukeratu duzue hori?

Ez dago arrazoi zehatzik. Tira, hor dugu Donejakue bidea, dagoeneko eginda dagoena eta segurtasuna ematen duena talde batek alde batetik bestera bidaiatzeko. Bidea ezagutzeak ere antolaketa errazten du; hala ere, aurten Nafarroako zatian aldaketa txiki batzuk egin nahi genituen, eta asmoa da urtez urte aldaketak egitea, garbi izanda zazpi lurraldeetatik pasatu behar dela. Lehentasunetako bat da hori, gizateriaren ondareak bisitatzearekin batera.   

Erlazionatuak

EuskarAbentura 2.0: betiko baloreak, bestelako bideetatik

Uribe Kosta

COVID-19a dela eta Euskarabentura espedizioa atzeratu behar izan da, baina haren ordez, antolatzaileek uztailean betetzeko erronka birtuala plazara...
Euskarabentura 2021era atzeratu da

Getxo

Azkenik, ez da Euskarabenturarik egongo aurten. Gazteek euskal kultura eta historia ezagutzeko espedizioaren antolatzaileek ekimena atzeratu eta az...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun