Azken hilabeteotan askotariko hedabideek okupazioaren aurka egiten ari diren tratamendu mediatikoa salatzeko asmoz, mobilizazioak iragarri dituzte Bizkaian zapatu honetarako, hilaren 28rako. Tartean, Uribe Kostako okupazio mugimenduak deia egin du Algortan egingo duten manifestazioan parte hartzeko, "Okupazioa sortu, lagundu eta babestu" lemaren pean. Eguerdiko 12:30ean jarri dute hitzordua, Telletxe plazan.
Pandemiaren urte honetan, 2020an, eskualdeko gune okupatuek hainbat gorabehera bizi izan dituzte. Osasun-alertaren erdian, Romoko Itzubaltzeta III gaztetxe okupatu berria hutsarazi zuen Getxoko Udalak; oraintsu, aldiz, Getxoko Txorimalo gaztetxeko kideek jakinarazi dute gune autogestionatua desalojatzeko arriskuan dagoela. Hori dena dela eta, zapatuko mobilizazioa Algortan egitea erabaki du Uribe Kostako okupazio mugimenduak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
