Elkarrekin Bizkaia taldeak eskatuta, Imanol Pradales Azpiegitura eta Lurralde Garapeneko foru diputatuak zenbait xehetasun eman ditu Itzubaltzeta/Romon egingo den Belaunaldien Arteko Zentroa nolakoa izango den azaltzeko. Aurreproiektuak aurreikusten duenez, Lope de Vega kaleko 12 zenbakian dauden eraikinak eraitsiko dira, eta bloke berri bat eraikiko da, sotoa, beheko solairua, lau solairu eta teilatupe bat izango dituena, gazteak eta adinekoak elkarregaz biziko diren gune komunez bereizita.
Aldundiak azaldutakoaren arabera, adinekoentzako 100 plaza prestatuko dituzte gune horretan, 76 banako logelatan eta 12 gela bikoitzetan; eta gazteentzako alokairuzko 40 apartamentu. Inbertsioa 13 milioi eurokoa izango da.
Pradalesen kalkuluen arabera, Itzubaltzeta/Romo auzoan kokatuko den, eta auzoari irekita egongo den, zentro "berritzaile eta aitzindaria" 2022ko udaberrian eraikitzen hasi ahal izango da, aurreikusitako epeei eutsiz gero; hala ere, aurretik eraikinak eraisteko proiektuak, eraikuntza-proiektua eta obra-zuzendaritza lizitatu beharko dira.
Diputatuak uste du enpresa esleipenduna hiru edo lau hilabete barru behin betiko proiektuan lanean has daitekeela, eta, horrek, urte honen amaieran eraiste-fasea hastea erraztuko lukeela. Hala, aurreikusitakoaren arabera, zentroa 2024ko udaberrian irekita egongo litzateke, 24 hilabeteko obraren ondoren.
