Ohar baten bidez Bizkaiko Pentsionisten Mugimenduak gogoratu du Itzubaltzeta/Romoko Nagusien Etxea eraistearen auzia "bidegurutze" batean dagoela, "epaitegiak adinekoek eta pentsiodunek beren topagunea, giza harremanak eta adinekoentzako eta beste kolektibo sozial batzuentzako ekimen ugari bultzatzeko tokia ez eraisteko egindako eskaera onartu ala ez erabaki arte, edo, aitzitik, Getxoko Udalak 1.600 pertsonen harremanetarako eta sozializatzeko eraikina eraisteko eta likidatzeko jarritako errekurtsoari babesa eman arte".
Azpimarratu duenez, urteak dira auzoko adineko pertsonak eta pentsiodunak, baina baita inguruko beste kolektibo sozial batzuk ere, Lope de Vega kaleko udal-eraikinak eraistearen kontra daudela. Gainera, joan den abuztuan eraikina hesitu eta zigilatu zutenetik, protestak ugaritu egin direla ohartarazi du mugimenduak, hala nola elkarretaratzeak eta Amaiajaiaren ibilaldia Bilbotik Itzubaltzeta/Romora.
Horren ildotik, Bizkaiko pentsionistek gogoratu dute bihar, barikuan, beste mobilizazio bat dagoela iragarrita, eta horretan parte hartuko dutela jakinarazi dute.