Goizeko 07:15ean jarri dute hitzordua gaur, eguaztenean, auzokideek Bizkaiko Foru Aldundiak bidalitako Redenor enpresako langileak nagusien etxea eta gaztetxea izandako eraikinetara sartzea ekiditeko. Lehenengo ordutik, Ertzaintzako brigada mugikorreko hiru furgoneta egon dira bertan, zain, inor lekura bertara ez zedin. Hala ere, ekintzaileek Lope de Vega kalera sartzea lortu eta eraikinak inguratzen dituen burdin-hesiaren atean jarri dira, eserita, elkarri lotuta, atzo egin bezala.
Euren asmoa da eraikinok ez botatzea, Getxoko Udalak eta Aldundiak haiek bota eta belaunaldien arteko zentro berri bat eraiki ez dezaten. Hala ere, ertzainek istiluen kontrako babesak jantzi eta eserialdia "modu bortitzean" desegiteari ekin diote. 08:00ak pasatxorako, egindako herri-harresia desegin dute. Zeregin horretan, ertzainek pertsona bat zauritu dute buruan, eta hasiera batean osasun langileek hura artatzea ukatu dioten arren, azkenean, Osakidetzako anbulantzia bat deitu dute.
#Ertzaintza|k gaur Itzubaltzeta/Romoko #lopedevega12 babestearen aldeko eserialdia desegin duen momentua, iruditan pic.twitter.com/aWCaoNBN8d
— Hiruka (@HirukaEus) February 15, 2023
Gizona lurrean botata egon da denbora luzez, mareatuta, osasun-beharginak lekura bertaratu, bertan artatu eta, azkenean, osasun-zentro batera eraman duten arte. Auzokideek deitoratu dutenez, hasieran, ertzainek leku-aldatzea oztopatu gura izan dute, baina, finean, trasladoa baimendu dute.
Protesta deseginda zegoela, bertan aritu direnek HIRUKAri jakinarazi diotenez, Lope de Vega kalearen ingurutik pasatzen diren gizon-emakume "susmagarriak" identifikatzen ari dira ertzainak orduotan, 11:00ak aldera, eserialdian eta protestetan parte hartu dutelakoan. "Identifikatzeko eskatzen ari dira, eta horri uko eginez gero, atxilo eramango gaituztela mehatxatzen ari dira", jakinarazi dute.
Polizien jarrera oldarkorra salatu dute
Atzo goizeko gertakarien ondotik, arrastian ere ertzainek manifestarien kontrako jarrera oldarkorra izan zutela salatu dute auzokideek, tokiko hainbat elkartek eta Udaleko oposizioko alderdiek. Goizean, pertsona bat atxilotu eta beste hainbat zauritu zituzten, tartean, HIRUKAko argazkilaria. Arrastian, berriz, manifestatzen ari zirenen kontra borra-kolpeka ere hasi ziren agenteak.
Arrastiko 19:00etan elkarretaratzea deituta zuten auzokideek, goizean bezala, Lope de Vega kaleko 12 zenbakiko eraikinak babestea aldarrikatzeko. Azkenean, manifestazioa egin zuten eta, une batean, ertzainak auzokideen kontra jo zuten.
Ildo horretan, Paco Rama Ibar Nagusien Etxea elkarteko presidenteak salatu du Ertzaintzaren jarrera "neurriz kanpokoa" izan dela bi egunotan: "Hemen gaudenok modu baketsu batean aritu gara protestan, gazte eta adinekoak, eta ertzainek modu oldarkor eta bortitz batean egin digute aurre. Haien jarreraren ondorioz, auzokide asko zaurituta artatu behar izan dituzte".
Atzo, 19:00etan, eraisketaren kontrako elkarretaratzea manifestazio bilakatu zuten herritarrek, eta, horretan ere, Ertzaintza euren kontra oldartu zen.
— Hiruka (@HirukaEus) February 15, 2023
Auzokideek, @GetxokoEHBildu eta @podemos_getxo taldeek polizien "jarrera oldarkorra" salatu zuten.#nagusienetxearomo pic.twitter.com/z4aiQGpIuM
Tokiko EH Bildu eta Elkarrekin Podemos udal-taldeek gogor salatu dute atzo jazotakoa. Ildo horretan, talde moreak iragarri du gaia urgentziaz jorratuko dutela Bozeramaileen Batzordean, "eta azalpenak exijituko dizkiogu gobernu-taldeari (EAJ eta PSE-EE).
Getxoko PPk, bere aldetik, deitoratu du EAJk eraikinon eraisteagaz abiatu gura izan duela hauteskunde-kanpaina: "Agirrek ez du kanpaina Nagusien Etxea eraitsita bakarrik egingo; are, gure adinekoak jipoitzen abiatu du".
Gaurko protestaldiaren zuzeneko jarraipena, Twitterren
Gaur ere, eraisketa lanak abiatu ez daitezen, langileak #LopedeVega12 kaleko eraikinetara sartzea galarazteko protesta egiten ari dira 07:15etik hainbat auzokide.
— Hiruka (@HirukaEus) February 15, 2023
Gaurkoan, hasieratik dago Ertzaintza egoera zelatatzen; brigada mugikorreko 3 furgonetagaz.#nagusienetxearomo pic.twitter.com/YBjbbpir1U
