Azken epaiketan, bi aldeek hurrengoak eskatu zituzten: Eusko Jaurlaritzako abokatuak, ertzainen ordezkari gisa, epaiketa baliogabetzeko eta agentea absolbitzeko eskatu zuen bideo bat "desagertu" zelako; Silviaren abokatua den Agatha Libano Alonsok Silvia absolbitzeko eta agentea kondenatzeko eskatu zuen. Azkenean, Euskal Autonomia Erkidegoko Justizia Auzitegi Nagusiak berretsi egin du Bizkaiko Auzitegiaren epaia, bi aldeen deuseztasun-eskaerak ezeztatuz.
Libanok adierazi du epai "gazi-gozoa" dela, agerian uzten dituelako justizia-sistemako desberdintasunak eta desafioak: "Zigorgabetasunaren eta botere-abusuaren errealitate gordina agerian uzten du; bestetik, azpimarratzen du erresilientziaren eta egiaren eta justiziaren bilaketarako konpromisoaren garrantzia delitu mota hauetan".
Halaber, nabarmendu du 5 urtetik gorako borroka nekaezinean aritu dela Silviagaz batera eta ikusi du nola babestu behar zuen sistemak "bidegabeki" zigortu duen. "Epai honek, nire ikuspegitik, ezagutzen ez nuen justiziaren alderdi bat ikustarazi dit, imajina daitekeena gainditzen duten zigorgabetasun-mailek eta botere-abusuek markatzen dutena, bereziki polizia-agenteen defentsan". Halere, berriro ere errekurrituko dutela baieztatu du, nahiz eta egoera zaila den, Silvia baliabide-ekonomikorik gabe dago eta.
