Gaur, ekainak 14, bilera egin dute aztertzeko Getxoko Udaleko etorkizuneko HAPOaren tramitazioari buruzko egutegia. Hala, Elkarrekin Podemosek nabarmendu du alegazioak aurkeztu dituzten herritarrek eta kolektiboek ez dutela jakingo azken irizpenean zer erantzun eman edo sartu diren, "bozketa baino 10 egun lehenago arte". Deitoratu duenez, hori EAJren eta PSEren "beste maniobra bat da" HAPOaren prozesua arintzeko eta "kaltetuek eragiteko tarterik ez izateko".
Azken irizpen hori batzordean eta uztailean deitutako ezohiko osoko bilkuran bozkatuko dute. "Fase berri honek kanpoan uzten ditu getxoztarrak prozesu honetatik. Horietako askok beren etxebizitzen etorkizuna jokoan dute. Gainera, udalerriko ikastetxeak eta eremu naturalak ere ukitzen dituen plana da", azpimarratu du Xabier Benito Ziluagak, Getxoko Elkarrekin Podemoseko bozeramaileak. Halaber, taldeak salatu du HAPOa herritarrei eta talde politikoei "bizkarra emanda" idatzi dela.
2022ko irailean onartu zen Getxorako Hirigintza Planak, beste bi fase izan behar ditu oraindino ere: behin-behineko onarpena 2024ko uztailean eta behin betikoa.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
