2022an, gidaririk gabeko tren batek Areeta eta Sestaoko metro-geltokiak itsasadarraren azpitik lotuko zituela iragarri zuen Unai Rementeria orduko ahaldun nagusiak. Proiektu hori ibilgailuentzako tunelagaz batera egingo zutela iragarri zuten orduan, baina hiru urte beranduago, egitasmoak zalantzak eta trabak baino ez ditu.
Publiko egindako azken azterlanaren arabera, lurraren ezegonkortasunaren ondorioz, tren-anezkak ibilgailuen tunelagaz batera egin beharreko ibilbidea aurreikusitako 300 metrotik 790 metrora handitu beharko litzateke. era berean, malda handiak direla-eta, trazadura osoa 2,5 kilometrotik 3 kilometro baino gehiagora luzatu beharko litzateke. Aldaketa horiek eraikitako metro bakoitzeko kostuak ia bikoiztu egingo lukete, hasieran aurreikusitako 35.000 eurotik 60.000 eurotik gora izateraino.
Hala adierazi du BGPak Sener enpresari egitasmoaren bideragarritasunari buruz egiteko eskatu zion txostenak. El Correo komunikabideak argitaratutako informazioaren arabera, txostena 2023an eskatu zuten eta 200.000 euroko kostua izan du.
Horretan zehazten denez, aipatutako maldak oso zaila egingo luke hasieran aurreikusitako tren automatikoa erabiltzea; horretarako, desnibela gainditzeko egokitutako motorra izango duen Metro Bilbaoko tren bat beharko litzateke.
Azkenik, Senerrek aurreratu du zerbitzu horrek eguneko 5.751 erabiltzaile izango lituzke 2028an, eta kopuru hori apala izango litzateke metroko bidaiarien egungo bolumenagaz alderatuta.
Pilota, Jaurlaritzaren teilatuan
Momentuz, Bizkaiko Foru Aldundiak Eusko Jaurlaritzaren esku utzi du anezka egiteko edo ez egiteko erabakia, Azpiegituretako diputatu Carlos Alzagak azaldu bezala, tren-azpiegitura Jaurlaritzaren eskumenekoak baitira. Hala ere, ibilgailuentzako tunela etorkizunean zerbitzu hori sartzeko moduan eraikiko duela aurreratu zuen.
Horrez gain, oraindino argitzeke dago baztertzeak Europar Batasunak emandako 200 milioi euroko maileguari eragingo ote zion. Mailegu horrek esplizituki aurreikusten baitzuen anezka proiektuaren zati gisa.
