Radio Euskadin egindako elkarrizketa batean, buruzagi jeltzaleak eraikinaren garrantzia erlatibizatu gura izan du, babes-maila apala zuela argudiatuz. "Badirudi Eiffel dorrea zela", adierazi du ironiaz, eta gaineratu du garrantzitsuena ez dela eraikina bera, baizik eta Udalak eta ikertutako hautetsiek zuzen jokatu duten ala ez aztertzea. Estebanen ustez, orain arteko informazioaren arabera, erakundeak zein zinegotziek zuzenbidearen arabera jardun dute uneoro.
Jeltzaleak defendatu egin du ikerketapean dauden zinegotziek proiektua sustatzen duen kooperatiban parte hartu izana. Haren esanetan, proiektua onartu zenean, kooperatiba oraindik ez zen existitzen, eta geroago sortu zenez, ez du mugarik ikusten udal-kargudunek bertan izena emateko.
"Etxebizitza bat bilatu behar al dute derrigorrez beren udalerritik kanpo? Hau da, zinegotziek pisu bat bila dezakete, pisu bat eros dezakete beren udalerrian bertan, bai ala ez? Erantzuna baiezkoa dela iruditzen zait, adibide asko ditugulako beste udalerri batzuetan", arrazoitu du Estebanek.
Era berean, buruzagi jeltzaleak gogorarazi du enpresa sustatzailea daborduko zigortua izan zela jauregiaren hormak botatzeagatik, finkatze lanik egin ez zela ikusi ostean. Hala, azpimarratu du Udalak "pauso zuzenak" eman dituela ondarea babesteko bere eskumenen barruan. Hala ere, aitortu du EAJk ezagutzen ez duen elementu berririk agertuko balitz horren neurrian jardun beharko luketela, baina une honetan "bola" bat sortzen ari dela deritzo, funtsik gabeko akusazio administratibo edo legaletan oinarrituta.
