Oposizioko alderdientzat, kargua utzi izana ez da nahikoa; PPk eta Elkarrekin Podemosek Amaia Agirre alkatearen dimisioa eskatu dute zuzenean. Eduardo Andrade popularren bozeramaileak leporatu dio alkateari informazioa ezkutatu izana eta bere zinegotziak babestu izana Ertzaintzaren ikerketa hasi zenetik. Antzeko bidetik jo du Xabier Benito Elkarrekin Podemoseko bozeramaileak, legealdia "agortutzat" joz eta Agirreri gobernu "onest eta garden" bat gidatzeko gaitasunik eza egotziz.
EH Bilduk ere bere jarrera berretsi du gertakari hauen aurrean, eta gogorarazi du beraiek izan zirela Fiskaltzari irregulartasunen berri eman ziotenak, ikerketa amaieraraino eramatea ezinbestekotzat jotzen dutelako. "EH Bilduk berretsi egiten du kudeaketa publikoan eredugarritasun handiena gordetzearen printzipioa, ustelkeria 0 izan behar dela, eta konpromisoa hartzen du lanean jarraitzeko gertaera horien ikerketan azkeneraino iristeko", gaineratu du ohar bidez.
Bestalde, PSE-EEko udal taldeak ohar bidez argitu gura izan du 2022ko lizentziak birgaitzea bakarrik baimentzen zuela, eta ez eraikin nagusia botatzea. Sozialistek azpimarratu dute 2024ko abuztuan gertatutako eraisketak baimendutakoa urratu zuela, eta prozesu administratiboa teknikarien eta idazkari nagusiaren babesagaz egin zela defendatu dute.
Alkatearen adierazpenak
Bere aldetik, Amaia Agirre Getxoko alkateak barikuan egin zituen adierazpenetan azaldu zuen du hiru zinegotzi ikertuakaz bilduta egon dela eta hauek alderdiaren esku utzi dutela beren kargua. Erabaki horren helburua, Agirreren esanetan, zinegotziek beren burua hobeto defendatzea eta alderdiaren zein Udalaren irudiari kalte gutxiago egitea da.
"Azpimarratu nahi dut beraien erabakia errespetatzen dudala, baita errugabetasun-presuntzioa ere, eta egoera berri honen aurrean ahalik eta lasterren ordezkatuko dugula, eta arduraz lan egin dugula; izan ere, arduraz lan egiten jarraituko dugu, justiziari laguntzen ez badiogu bezala", gaineratu du alkateak.
