PPk azaldu duenez, dokumentu horrek frogatutzat ematen du udal-gobernuak bazuela proiektuaren berri, nahiz eta publikoki kontrakoa adierazi. Horren harira, Eduardo Andrade PPko bozeramaileak gogor kritikatu du jarduneko alkatearen jarrera: "Portuaren beraren alegazioak aitortzen du aurretiko akordio bat bazegoela. Jarduneko alkateak primeran zekien zer ari zen adosten, eta herritarrak engainatzea erabaki zuen".
PPk gogorarazi du alkateak, komunikabideen aurrean, hotelaren tamainagaz harrituta agertu zela eta proiektutik aldentzen saiatu zela, nahiz eta, PPren arabera, proposamena aspaldidanik mahai gainean egon eta udal-gobernuaren ezagutza izan. Gainera, ohartarazi dute Portuaren alegazioak agerian uzten duela ez dela eraikin bakarraren auzia, baizik eta eremu osoan eraikigarritasuna handitzeko estrategia urbanistiko baten parte dela.
"Kontrolik gabeko Udala dugu, herritarren bizkarrean akordioak onartzen dituena eta ondoren eskuak garbitu nahi dituena kritikak agertzen direnean", gaineratu du Andradek. PPk egoera hau 2026ko urtarrilaren 29ko osoko bilkuran azaldutako gobernuaren higaduragaz lotu du, udal-gobernuaren sinesgarritasun falta eta azalpenak emateko ezintasuna azpimarratuz.
Azkenik, PPk jarduneko alkateari erantzukizunak bere gain hartzeko eskatu dio, azalpen publikoak eman ditzan eta herritarrak "engainatzeari utz diezaion". Andradek amaitzeko esan duenez, "ezin da gezurretan gobernatu. Dokumentu ofizialek udal gobernuaren kontakizuna gezurtatzen dutenean, gutxienekoa aurpegia ematea da".
