Koalizio abertzaleko kideek ohartarazi dutenez, "dena modu irregularrean egin izanaren zantzuak daude", eta, horregatik, azpimarratu dute eskura dituzten baliabide guztiak jarriko dituztela obrak berehala geldiarazteko eta eraikina zegoen tokian eta zen bezala altxa dadin berriro. "Ez dugu adreilu bat gehiago ere eraikitzerik nahi, harik eta epaileek zer gertatu zen eta norbait kondenatu behar den zehazten duten arte".
Koalizioaren hitzetan, sustatzaileek 730.000 euro baino gehiagoko aurrezkia lortuko lukete jauregia botatzeagatik, eta hori "legearen aurkako jardueraren ondorio zuzena" izango litzateke. "Araudia argia da: eraitsi behar ez zen zerbait botaz gero, egin zuena behartua egon daiteke zen bezalaxe berreraikitzera, leiho bakoitza, harri bakoitza eta xehetasun historiko bakoitza errespetatuz", ebatzi dute koalizio abertzaleko kideek.
137 aldaketa
Lanakaz jarraitzeko baimena Udaleko Planeamendu eta Diziplina arloak sutatzaileak aurkeztutako dokumentua ontzat eman ostean etorri dela azaldu du ElCorreo komunikabideak. Zehaztu dutenez, legeak aukera ematen du obrak aurrera eramateko, baldin eta legezkotasun urbanistikoa berrezartzen bada eta eraikina berreraikitzen bada. Horretarako, Ereaga Atalaya kooperatibak proiektu berritua aurkeztu beharko du, eraikina lekuz mugituz eta zenbait aldaketa txiki eginez.
Udaleko ondare-arduradun arkitektoak 137 aldaketa "funtsezko" zenbatu ditu jatorrizko proiektuarekiko: etxebizitza batzuetan logela gehiago, okupazio handiagoa eta erlaitz altueran 34 zentimetroko igoera, besteak beste. Gainera, eraikina XIX. mendeko itxurara ahalik eta gehien egokitu beharko dute, harriz landutako armarri historikoa berreskuratuz eta estilo neoklasikoa errespetatuz.
