Gotzainen Biltzarreko ordezkari bik gaztearen gurasoakaz ekainaren 19an izan omen zuten bilera "tranpa eta iruzurra" izan zela uste dute ikasle ohiaren senideek. "Fedearen Irakasbiderako Kongregazioak sexu-abusuak izan zirela baieztatzeko frogarik ez zegoela zabaltzeko erabili omen zuen bilera", diotenez. Gotzainen Biltzarrak gezurtatu egin zuen batzar hori egon zenik.
Bestalde, Mario Iceta Bilboko gotzainaren jarrera publikoki salatu du familiak. Gotzainaren "jarrera zaputza" kritikatu dute ikasle ohiaren senitartekoek, babesa emateko telefono-dei "bat ere" ez dielako egin. Nahiz eta "tragediaren berri izan, ez du inoiz lagundu", erantsi dute. Horregatik, "Bilboko Gotzaindegiaren kudeaketa beldurgarria publikoki onartzeko eta, Mario Iceta jaunari, egindakoa zuzentzeko" eskatu dio familiak.
Azkenik, Imanol Goyarrola Gaztelueta ikastetxeko zuzendariari, Iñaki Cires zuzendari ohiari eta Gonzalo Landaburu kapilauari "gezurretan aritzeari uzteko" eskatu diete ikasle ohiaren senideek. "Nahiz eta berandu izan, onartu beharrekoa behingoz onartzeko" eskatu diete.
