Politika  Leioa 2019-01-28 15:52

Udal-tasak jaisteko borondatea agertu du PPk, Jazael Martínez alkategaiaren aurkezpenean

Unai Brea

Gaur-gaurkoz zinegotzia den Jazael Martínez aukeratu du Leioako PPk maiatzeko udal-hauteskundeetan alkategaia izateko. Gaur egin dute haren hautagaitzaren aurkezpena, Raquel González popularren Bizkaiko presidentea buru eduki duen ekitaldian.

Udal-tasak jaisteko borondatea agertu du PPk, Jazael Martínez alkategaiaren aurkezpenean
Jazael Martínez (argazkiaren erdian, lehenengo lerroan) Leioako auzo bakoitzari aurrekontu bat emateran alde agertu da bere aurkezpenean. © PP | Ikusi handiago | Argazki originala

Lan-kontuak direla eta aspalditik dauka Leioagaz lotura Martínezek. 2004tik dago afiliatuta alderdian, eta azken agintaldian zinegotzia izan da Leioan. Bere aurkezpenean, adierazi du Leioa "paralizatutako udalerria" dela: "EAJren azken hauteskunde-programak ikusi besterik ez dago; La Avanzada lurperatuko dutela eta tranbia ekarriko dutela esaten daramate hamabost urte, baina Eusko Jaurlaritzatik proiektuok lehenesten ez dituen euren alderdiari men egiten diote gero". 

Hauteskundeak irabaztekotan udal-tasak eta zergak jaitsiko dituela hitz eman du Martínezek. "Uste dugu gehiago egin daitekeela gutxiagogaz; hobari-sistema bat ezarriko dugu, gure bizilagunei bizimodua errazteko".

Bestalde, Auzo Batzordeak sortzeko proposatu du, auzo bakoitza aurrekontu bat eduki dezan eta "bertakoek erabaki dezaten diru horregaz zer egin", eta gaur egungo udal-gobernuaren hizkuntz politika kritikatu du, umeak "doktrinatu" egiten direla esanez: "Denentzat gobernatu gura dugu, baina libreki, eta ez, orain PSOEk egiten duen moduan, umeak jolas-orduetan euskaraz egitera behartzeko dirutza gastatuz".

Segurtasuna ere izan du berbabide, bere alderdiak joan den azaroan egindako eskariaren ildotik. Azken boladan delinkuentzia Leioan %75 handitu dela adierazi du Martínezek (ez du zehaztu zer epetan), eta horri aurre egiteko udaltzain gehiago eta komisaria berria beharrezkoak direla gehitu du. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa