Koronabirusa Uribe Kostan

Leioako udako jai denak, bertan behera

Iazko San Juan jaien irudi bat.

Iragarrita zegoen aurten ez zela jairik egongo Lamiakon, eta bart jakinarazi du Leioako Udalak gainerako auzoetako jaiak, baita sanjuanak ere, bertan behera uztea erabaki duela koronabirusa dela eta. Erandiok hartutako bide beretik, jaietarako izango zen dirua pandemiak kaltetutakoei laguntzera bideratuko dute. 

Sanjuanak ez ospatzeaz gain, Udalak Lamiakoko, Txorierriko, Pinuetako, Santimamiko, San Bartolomeko, Ondizko, Udondoko eta Txopoetako jai-batzordeaz adostu du auzoetako jaiak ere bertan behera uztea. "Eskerrak eman nahi dizkiegu udal-langileei, kultur eragileei, txosnen batzordeari, kultur kirol- eta gizarte-elkarteei eta, oro har, Leioako gizarte osoari, jaiak prestatzen egindako lanarengatik eta hartutako konpromiso handiarengatik", adierazi dute.

Jaietarako izango zen aurrekontuaren zatia tokiko ekonomia suspertzeko eta COVID-19 epidemiaren ondoriozko krisia gehien jasaten dutenei laguntzeko erabiliko dutela azaldu dute. Iban Rodriguez alkatearen esanetan, hartutako neurriak laguntza-politika berriak diseinatzeko balioko du, daborduko iragarri direnak indartzeaz gain.

 

Erlazionatuak

Lamiakoko jaiak, bertan behera

Leioa

Lamiakon espero zuten mezua heldu da: maiatzaren 29tik 31ra bitartean aurreikusita zeuden San Maximo jaiak bertan behera gelditu dira COVID-19aren ...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun