Bihar, otsailak 2, Hezeguneen Munduko Eguna izango da, eta hitzordu hori baliatuta, Ecologistas en Accion taldeak iragarri du aste-akabuan hainbat ekintza egingo dituzte Espainiako Estatutan hezeguneak leheneratzea aldarrikatzeko, hala nola martxak, sentsibilizazio-jarduerak eta hezeguneen egoera ekologikoari buruzko txostenen aurkezpenak.
Gainera, iragarri dute laster Natura Leheneratzeari buruzko Europako Erregelamendua onartzea aurreikusten dela. Horrek 2030erako Europako ekosistemen % 20 berreskuratzea planteatzen du. Adierazi dutenez, erregelamendu hori onartzekotan, estatu kideek 24 lau hilabeteko epea izango lukete Leheneratze Plan Nazionalak egiteko, eta plan horietan ezarriko diren helburuak betetzeko beharrezkoak diren eremuak eta neurriak zehazteko.
Testuinguru horretan, Ekologistak Martxan elkarteak ohartarazi du talde ekologistek eta auzo-elkarteek "kezkaz" jarraitzen dituztela Bizkaiko Foru Aldundiak abian jarritako proiektuak, tartean, Bilboko itsasadarraren eskuinaldeko bidegorria eraikitzeko egitasmoa edo Urdaibaiko Guggenheimaren proiektua.
Azaldu dutenez, itsasadarreko bidegorriaren proiektuaren inguruan iragarri dituzten xehetasunen arabera, oraindik ez dago Lamiakoko hezegunea berreskuratzeko planik zehaztuta. Halaber, azpimarratu dute Lamiakoko padura Euskadiko hezeguneen zerrendan katalogatuta dagoela hirugarren kategorian, eta horrek esan nahi duela padura kokatuta dagoen udalaren esku dagoela kudeaketa, kasu honetan, Leioako Udalaren esku.
Ekologistak Martxan taldearen iritziz, "padura berezi hori berreskuratzea atzeraezina da". Horregatik, proposatu dute "zona horretan bertan kota jaistea, mareetan ura errazago sar dadin, eta, bizikletentzako edo oinezkoentzako pasealeku bat eraikiz gero, egurrezkoa egitea, Gorlizen dagoenaren bezalakoa, bidegorri bat ere igarotzen baita bertatik".
