Koalizio abertzaleko kideek udalerriko sare soziala indartsua dela azpimarratu dute, horregatik, zenbait eragilerentzako diru-laguntzak berreskuratzea edo indartzea beharrezkoa ikusi dute, hala nola mugimendu feministaren eguneroko gastuak asebetetzeko 1.000 euroko partida, eta "egoera prekarioan dagoen" Plentzia Telebistari subentzio nominala 10.000 eurotan igotzea, eta horren balioa sustatzeko beste 10.000 euro bideratzea.
Bestalde, deitoratu dute "udalerriaren mantentze- eta garbiketa-egoera kaskarra denon begi bistakoa dela". Horregaz bukatzeko, proposatu dute Ekintza azkarreko brigada sortzea, "herrian sortzen diren arazo puntualak konpontzeko helburuarekin". Horrek, udal-brigadaren egoera "prekarioa" hobetzeaz gain, konponketak egiteko kanpo-enpresak kontratatzea ekidingo lukeela argudiatu dut. Horretaz gain, udal-brigadarako langileak kontratatzeko 70.199 euro bideratzea ere planteatu dute. Garbiketaren arazoari dagokionez, hori konpontzeko garbiketa-kontratuaren zenbatekoa 80.000 eurotan handitzea ere proposatu dute.
Kulturari dagokionez, deitoratu dute Plentzian dagoen galera kulturala "nabaria" dela, eta hori ekiditeko ekintza kulturalak sustatzeko partida 15.000 eurotan igotzeko aukera adierazi dute. Ildo horretan, Historia Jardunaldiak eta Kantauri Itsasoko Kultura Kongresua bezalako ekintzak sustatzea "ardatz estrategikoa bezala ikusten dugu", azpimarratu dute, horregatik, horien diru-partida 10.000 euro handitzea eskatu dute, "herriko historia bultzatzeko hain garrantzitsua bihurtu den Plasentia de Butron museoa handitzeko ikerketa bat garatzea ere planteatuz".
Zentzu horretan, udalerriko ondare kulturala eta naturala batzen dituen udal-basoen egoera hobetzeko 1.500 euroko diru-partida sortzea ere proposatu dute, "Isuskitzan hain eragin ona izan diten lanak herriko udal-basoetara bideratu daitezen".
Arpillaoko lokalak
Plentziak dituen beste arazo batzuk konpontzeko ikerketetara bideratzen den diru-partidak prestatzeko eta handitzeko beharra ere adierazi dute EH Bilduko kideek. Hasteko, "Arpillaoko lokalen egungo egoeraren ikerketa zehatz bat egiteko 18.000 euro bideratzeko eskatzen dugu". Era berean, diru-kopuru berdina planteatuko dute, hurrenez hurren, Isuskitzako hirigunera doan errepidearen jabetza argituko duen espediente baten irekiera eta garapena egiteko, eta Plentziako etxebizitza-arazoa konpontzeko politika eraginkorrak bultzatzeko.
Azaldu dutenez, gastu proposamen horiei aurre egiteko, Plentziako Bat izeneko egitasmoko 200.000 euroko partida ezabatzea eskatuko dute, ekimen horren helburua ez baitute "batere argi ikusten". Era berean, berriki udal-gobernuak egindako inkestan izandako "iritzi negatiboak ikusita", alkatearen soldata 20.000 eurotan gutxitzea proposatu dute, 36.057,26 eurotan utziz.
#Plentzia!ko EH Bilduk 13 emendakin aurkeztu dizkio udal gobernuak 2022rako planteatutako aurrekontu proposamenari
— EH Bildu Plentzia (@EHBilduPlentzia) May 20, 2022
Udal gobernuak aurkeztutako proposamenari 369.699€tan baloratutako emendakinak aurkeztu dizkiogu, hemen informazio gehiago: https://t.co/hGeEaaCB0Q pic.twitter.com/pznaR40zN0
