Arpillaoko gainontzeko lokal guztiak bezala, aparkalekuak 2020tik darama itxita, baina, abenduan, Udalak azpiegituran konponketa partzialak egingo dituela iragarri zuen, 2021ean igorritako txosten tekniko baten arabera obrak egitera behartzen duen epai judizial bati jarraituz. Esku-hartzearen kostua 600.000 eurokoa izango dela ere zehaztu zuten, nahiz eta EH Bilduk gidatutako Udalaren hasierako proposamenak 3 milioi euroko esku-hartzea proposatzen zuen.
"Filtrazioek eragindako egituraren arazoak" argudiatuta, 2020an EAJren aurreko gobernu-taldeak aparkalekua itxi zuen. Horren eraginez, aparkalekuak esleituta zituzten 600 erabiltzaile baino gehiago aparkaleku gabe utzi zituzten, berez aparkaleku-arazo larriak dituen udalerrian.
Horri erantzunez, 2022an, emakidadunak defendatzen zituen elkarteak epaitegietara jo zuen Udalaren isiltasun administratiboa salatzeko. 2023ko martxoan, epaitegiek arrazoia eman zien, eta Udalari konponketei erantzuteko agindu zion.
Asmo handiko egitasmorik ez
2024ko udal-hauteskundeetan EH Bilduk bereganatu zuen Plentziako Udalaren gidaritza eta, besteak beste, Arpillaoko aparkalekua berritzeko anbizio handiko proiektua egin ahal izateko helegitea jarri zion epaiari. Horren arabera, 3 milioi euro inguru inbertitu gura zituzten lurpeko aparkalekuaren birgaitzeko eta lur gaineko inguruaren berrantolaketarako. Hala ere, Udalak jarritako errekurtsoa atzera bota zuten eta lanak konponketetara mugatu behar izan dituzte.
EH Bilduren ustez, epaiak "ez die behar bezala erantzuten ez inguruaren ez eraikinaren beharrei", zaharkituta egon daitekeen txosten tekniko batean oinarritzen baita. Eraistea bezalako alternatibak aztertu arren, gobernu-taldeak ebazpen judiziala betetzea erabaki du, lege-kostu handiagoak saihesteko eta zentroko plaza-falta arintzeko.
Erabaki horregaz, aparkalekua laster berriro martxan jartzea espero dute, Plentziako bizilagunentzako eta bisitarientzako zalantzazko aldi luze baten amaiera markatuta.
