Udal-hauteskundeak 2019

Unai del Burgo izango da EH Bilduren alkategaia Sopelan

© EH BILDU

Unai del Burgo EHUko irakasle eta UEUko kidea izango da Sopelako EH Bilduren alkategaia 2019ko maiatzean egingo diren udal-hauteskundeetan. Aurtengo urritik talde horretako zinegotzia da Sopelako Udalean, aurretik zegoen kide bat ordezkatuta.

Urrian egindako hautaketa-prozesuaren ostean, EH Bilduk jakinarazi du Unai del Burgo 40 urteko sopeloztarra izango dela koalizioko zerrendaburua herri horretan. Informazioa zabaltzeko emandako prentsa-oharrean adierazi dutenez, "Sopelako hainbat talde eta esparrutan ibilitakoa" da alkategaia. Haren ibilbidea "ekonomiari, unibertsitateari eta euskalgintzari" lotuta dago.

Unai del Burgo irakaslea da EHUko Ekonomia eta Enpresa Zientzien Fakultatean, eta ikertzaile dabil unibertsitate horretako GEZKI Institutuan. Gainera, UEUko ekonomia-saileko kide da, baita kontabilitate- eta administrazio-arduraduna ere.

Hauteskunde-zerrenda osatuko duten beste pertsonak aukeratzeko prozesua datorren urteko martxoan egingo dutela adierazi du Sopelako EH Bilduk. Horretan parte hartzeko derrigorrezkoa izango da koalizioaren barne-erroldan izena ematea.

Hauteskunde-programa osatzeko parte-hartze saioak

Udal hauteskundeetan aurkeztuko duen programa egiteko hiru parte-hartze saio antolatu dituzte. Lehenengoa joan den azaroaren 14an egin zuten, herriaren egoera aztertzeko. Hilaren 28an izango da bigarren saioa, Sopelaren arazoei irtenbideak bilatzeko helburuagaz. Azkenik, abenduaren 13an bilduko dira, jasotako proposamenetatik abiatuta lehentasunak finkatzeko.

Erlazionatuak

Nerea Guijarrubia izango da Getxoko EH Bilduren alkategaia

Getxo

Bihar, eguenean, Getxoko EH Bilduko kideek Nerea Guijarrubia koalizio abertzaleko alkategaia izango dela berresteko aukera izango dute, Algortako V...
Jokin Ugarte Egurrola izango da Leioako EH Bilduren alkategaia

Leioa

Hurrengo udal-hauteskundeei begira, zerrenda anitz eta zabala osatzeko borondatea adierazi du Leioako EH Bilduk. Hala, 2011tik zinegotzia den Jokin...