Sopelako erdigunea zeharkatuko duen bidegorria egiteko lanak lizitatu dituzte

Bidegorri berriak erdigunea zeharkatuko du, beste ibilbide batzuekaz elakartuz. © SOPELAKO UDALA

Loroñoko beheko aldetik Kurtzio kultur etxera arte herrigunea zeharkatuko duen bidegorriaren trazadura ezagutzera eman du Sopelako Udalak; egitasmo horren bitartez, erdigunea erdi-oinezkoentzako egiteko beste pauso bat eman gura du. 

Sopelako erdigunea bizikletentzako eta oinezkoentzako atseginagoa egingo duen bidegorria egiteko lanak lizitatu dituela jakinarazi du Udalak. Egitasmo horren bitartez, Loroñoko behealdea Kurtzio inguruagaz lotuko dute, udaletxearen paretik pasako den bizikletentzako bide bategaz. 

Egitasmo horretarako, Udalak 221.270,96 euroko aurrekontua bideratu du. Udal-iturriek azaldu dutenez, proiektua orain arte markatutako helburuen barruan sartzen da, horri esker bizikleta-sarea erdiguneraino helduko baita.

Gaineratu dutenez, planteamendu honek bat egiten du Akilino Arriola erdi-oinezkoentzako bihurtzeko asmoagaz, eta Ripatik doan saihesbide bat sortzeko proiektuagaz. Horregaz, herrigunea zeharkatzen duen trafiko astuna kanporatu gura dute, erdigunea oinezkoentzako eremu atseginago bat bihur dadin.

Bidegorriaren ibilbidea

Bidegorria Uribe Bazterra etorbidean hasiko da, lehendik dagoen sareagaz lotuz. Hortik, Loroño kalea gora joango da udaletxeraino, horretatik hurbilen dagoen galtzadaren aldetik. Hori gauzatzeko, Akilino Arriola kalean, udaletxe inguruan, lineako aparkalekuak kenduko dituzte bidegorriarentzako behar beste leku egiteko; horrek, errepidearen trazadura desplazatzea ere suposatuko du. Ondoren bidegorriak Mendieta kalean gora egingo du Kurtzio kultu etxearen pareraino.

Azaldu dutenez, proiektu honek Uribe Kostako Mankomunitatearen apustuetako bat sendotzen du, eskualdean bidegorrien sare handi bat sortu gura baitute. Duela zortzi urte hasi zituzten lanakaz kanpoko sarea landu zuten, udalerriak batzeko, eta, orain, helburua da "barruan jardutea eguneroko eskaerei erantzuteko; horrela, proiektu honegaz, Udalak aurrerapauso garrantzitsua eman du iraunkortasunaren eta hiri-mugikortasunari dagokionez".

Erlazionatuak

Mugikortasuna hobetzeko proposamenen inguruan iritzia emateko aukera badago Sopelan

Erabiltzailearen aurpegia Sopela

Irailaren 19tik (ostirala) urriaren 3ra arte Sopelako udal igerilekuen sarreran erakusketa parte-hartzaile bat egongo da ikusgai, herritarrek Sopel...
Bizikleta-bideen proposamenak batu gura ditu Mankomunitateak

Uribe Kosta

Uribe Kostako Zerbitzuen Mankomunitateak herritarren iritziak ezagutu gura ditu bizikleta-bideen plan bat osatzeko; horretarako, maiatzaren 28ra ar...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun