Sopelako Iberre eta Zipiriñeko Ikasleen Guraso Elkarteak emozioz beteta jakinarazi du hezkuntza komunitateak proposatutako proiektua burutzea erabaki duela Hezkuntza Sailak. Hala, Sopelako Haur Hezkuntza Loroñon egongo da, Lehen Hezkuntza Zipiriñen eta DBH eta batxilergoa Iberren, eraikina handitu ondoren. Horren ondorioz, adierazi dute bertan behera utziko dituztela aurreikusitako aldarrikapen eta manifestazio guztiak, daborduko nahi zuten akordio lortu baitute.
Atzo, apirilak 24, Jokin Bildarratz Hezkuntza Sailburuagaz eta bere taldeagaz bildu zen Sopelako hezkuntza-komunitatea. Hala, hainbat bilera eta azken hilabetetako mobilizazioen ondoren, konprometitu dira hezkuntza-komunitateak onartutako proiektua aurrera eramatera.
Iberre eta Zipiriñeko IGEk akordio hau lortzen lagundu eta parte hartu duten lagun guztiak zoriondu dituzte. Era berean, Jokin Bildarratzen taldeari eskerrak eman dizkiete Sopelako hezkuntza komunitatearen proposamenaren aurrean "hartutako konpromisoagatik, emandako arretagatik eta bere egiteagatik".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
