Irailaren 15ean, Urdulizko Mecaner enpresako langileak lantokiaren aurrealdean elkartu ziren salatzeko Stellantis multinazionalak 148 langile kaleratuko dituela: irailaren 1ean, enpresak jakiarazi zien lantokia ixteko nahia zuela langileei Enplegu-Erregulazioko Espediente (EEE) bat ezarriz. Hala, guztira 148 langile lan gabe geldituko dira; 144 Mecanerrekoak eta 4 garbiketa azpikontratakoak. Azaldu dutenez, erabaki hori Mecaner barnekoa den Stellantis multinazionalak hartu du, Peugot, Citroen, Opel edota Jeep marken jabe dena. Halaber, langileek deitoratu dute multinazionalak "etekinak pertsonen aurretik jartzen dituela" eta, horren aurrean, argi adierazi dute euren lanpostuengatik borrokatuko dutela.
