Mugak Zabalduz karabana 2018

hiruka.eus

Ventimigliako manifestazio jendetsuan parte hartu du Mugak Zabalduz Karabanak

Testua: Iker Rincon / Bideoa: Hodei Torres

Italiako, Frantziako eta Mugak Zabalduz Karabanako 4.000 pertsonatik gora elkartu zen atzo Ventimiglian (Italia) egindako nazioarteko manifestazioan. Bertan, pertsona migratzaileek europar bizileku-baimena eskuratu ahal izateko eskubidea aldarrikatu zuten, besteak beste.

Mugak Zabalduz Karabanak Ventimiglian egin zuen lehenengo parada Italian, alegia, Frantziaren eta Italiaren arteko mugan dagoen herrian. Manifestazioa deitu duen Progetto20K sareak gogorarazi zuen horixe dela Europako barne mugarik "hilgarrienetarikoa": "Mediterraneo itsasoa hilobia bada, Ventimiglia Europa ireki baten porrotaren ikurra da. Schengen akordioaren arabera, Europako barne mugak ez dira existitzen; hala ere, gaur egun muga horiek bikoizten dabiltza, baita militarizatzen ere. Hala, merkantziak modu librean garraiatu ahal diren bitartean, pertsonak hiltzen dira horietan", salatu zuten ekintzaileek manifestazioaren akabuan irakurritako manifestuan.

Liguriako poliziez, carabinieri-ez eta udaltzainez inguratuta, 16:00etan abiatu zuten manifestazioa. Martxan, 4.000 bat lagunek zortzi kilometroko ibilbidea egin zuten, euren aldarrikapenak Ventimigliako kaleetan ozen zabaltzeko. Askotariko mezuak entzun ahal izan ziren mobilizazioan, hala nola migrazio-fluxuen inguruan Italiak zein gainontzeko gobernuek hartutako politika "gogorrak" salatzeko, baita mugikortasun eta harrera-eskubide duina aldarrikatzeko ere. Gainera, pertsonen salerosketa eta pertsona migratzaileek pairatzen duten genero-indarkeria eta esplotazioa salatu zituzten.

Argazki-galeria (HODEI TORRES)

Mugak Zabalduz karabana 20180714 Ventimiglia

Ventimiglia, harreraren porrota

Ekintzaileek jakinarazi dutenez, Ventimigliara heltzen diren pertsona migratzaileek gurago dute kalean lo egitea, inolako osasun-baldintza barik, instituzioek kudeatzen duten egokitutako zentrora joatea baino, poliziak "uneoro" jazartzen dielako. Diotenaren arabera, mota horretako zentroak pertsona migratzaileak diziplinatzeko eta gutxiesteko erremintak dira: "Nortasuna kentzeko segregazio-eremuak dira; giza duintasuna kolokan ipintzen dute”.

Datuen arabera, gutxienez 16.500 etorkinek gurutzatu zuten Italia eta Frantzia arteko muga Ventimigliatik azkenengo hamabi hilabeteetan, eta horietatik denetatik, laurden bat adingabeak izan ziren. Horiek, askotan, 12 urtez azpikoak izaten dira, eta abusuak, atxiloketak eta legez kontrako itzultzeak pairatzen dituzte Frantziako Poliziaren partetik, Oxfam Intermón elkarteak txosten batean zabaldu duenez. Nabarmendu beharra dago, gainera, 2017ko abuztuaren eta 2018ko apirilaren artean 12 pertsona hil zirela muga hori zeharkatu guran, inguruan lan egiten duten hainbat taldek jakinarazi dutenez.

Atzoko manifestazioaren akabuan, hitza hartu zuen Mugak Zabalduz Karabanako bozeramaileak. Horrek, Europar Batasunean gailentzen dabilen faxismoari eta arrazakeriari aurre egiteko beharra nabarmendu zuen, eta azpimarratu zuenez, hori lortzeko beharrezkoa da gizartean modu antolatuan lan egitea.

Siziliara bidean

Orain Genovara bidean daude Mugak Zabalduz Karabanako kideak. Bertan, ferry bat hartuko dute gaur, bihar arrastian Siziliako Palermo hirira heltzeko.

Erantzunak

Edurne Perez Manso Erantzuna | #1

Bai herriko erantzun politte!!! Zoritzarrez ezin izan dot parte hartu baina ikusgarria benetan elkartasuna eta elkarkidetzaren jarrera. Han ez naiz egon fisikoki baina bai nire borrokaren bihotza. Eskerrik asko parte hartu duzuenentzat eta aurrera jarraitu. Historian zehar ikasi dugu herriko batasunarekin dana lortu ahal dela. Animoa eta aurrera.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa