Eskualdeko baserritarren argi-itzalak

“Azoketara joateko ohitura gero eta txikiagoa da orokorrean”

Hasieran soloa lantzen eta kontsumo-taldeetan ibili ondoren, kontserbetan oinarritu du bere bidea Bengoetxeak.

Unibertsitateko ikasketak amaitu ondoren, aitite eta amamaren baserrira bizitzera joan zen Haizea Bengoetxea getxoztarra. Nekazaritzan lehenengo urratsak eman zituen bertan, familiagaz, eta orain Gamiz-Fikan lekutu du lantokia, Olatxuko Laboreak proiektuari ekiteko.

Nekazaritza-ingeniaritza amaitu eta segituan argi izan zuen Haizea Bengoetxea getxoztarrak baserritik bizi gura zuela, “lurrarekin kontaktu horri eusteko”. Hala,  2011n, aitita-amamaren etxera bizitzera joan zen, Olatxu baserrira: “Nekazaritzatik bizi nahi nuen, modu agroekologikoan, eta horretarako lehenengo kontaktua familiako baserrian eman nahi nuela argi nuen”. Bertan eman zituen lehenengo pausoak, eta soloan landutako dena kontsumo-talde baten bitartez saltzen zuen.

Baserrian fruta asko zegoela ikusita, aterabide bat emateko kontserbak egiteari ekin zion; horixe izan zen gaur egun Olatxuko Laboreak proiektua denaren lehenengo urratsa. “Mundu hori gehiago gustatu zitzaidan, eta apurka-apurka horretan formatzen hasi nintzen”, azaldu du Bengoetxeak. Behin proiektua finkatuta, familiako baserria utzi eta beste bat hartu zuen Arrietan, alokairuan, 2013an. Lantokia ipini eta kontserbetan oinarritu zuen bere jarduna; gerora, gauza gehiago egiten hasi zen, hala nola marmeladak eta barazki-pateak. “Frutari aterabidea ematea zen helburua, hainbat modu eta formatan”. 

Orain dela urte bi, fruta-arbolaz betetako eta negutegidun lursail bat erosi zuen Gamiz-Fikan, bikotekideagaz, bertan lantegi berria eta baserria egiteko, “momentu horretan genuen alokairuak ez zigulako inolako bermerik ematen etorkizunari begira”. Getxoko gazteak azaltzen duenez, mota horretako jarduna aurrera eroateko beharrezkoa da erregistro sanitarioa izatea eta autonomoetan alta emanda egotea: “Modu horretara azokaz azoka ibili gaitezke gure produktuak saltzen, baita denda txikietan eskaini ere”.

Kontsumo-ohiturak

Gaur egungo gizartea oso azkar doa eta egoera horrek kontsumo-ohituretan eragina duela uste du Bengoetxeak: “Edozein lekutan edozer gauza kontsumitzeko aukera dago, eta horrek gure produktuak gizarteratzeko aukera gutxi ematen dizkigu”.

Plazaz plaza eta azokaz azoka mugitzen da Bengoetxea kontserbak zuzenean saltzen, hala ere merkatu horietara joateko ohitura galdu egin dela dio. “Aste-akabuetan jende gaztea etortzen da, baina astean zehar erosleen profila nahiko heldua da. Horrek esan gura du jende gazteak beste modu batera kontsumitu eta jaten duela”. Izan ere, elikadurari garrantzia eman eta jaten duguna zaintzen hasi garen arren, orokorrean oraindino erosketak supermerkatu handietan eta modu azkarrean egiten ditugula uste du nekazari gazteak.

Azokez gainera, komertzio txikiakaz ere egiten du lan. “Bitartekariak izan arren bestelako baloreak dituzte; asko eskertzen dute gureak bezalako produktuak izatea, ekoizpen diferentea nahi dute horiek, kalitatezkoa. Hortaz, astiro-astiro bada ere, harrera ona daukagula uste dugu”, azaldu du. Era berean, ikastaroak ematen ditu Bengoetxeak: “Jendeak gero eta interes handiagoa du gauzak etxean egiteko. Guk kontserbak egiteko gure jakintza nahi duenarekin elkarbanatzen diogu, modu erraz batean”.   

Erlazionatuak

“Abeltzaintzak ez dauka irtenbide askorik gaur egun, oso garestia da”

Getxo

Gaztetatik eman zituen nekazaritzaren munduan lehenengo pausoak Beñat Bilbao algortarrak. Lagun-taldeagaz ortua izan ondoren, baserritarrare...
“Lurra lortzea zaila izango ez balitz, baserritar gehiago egongo litzateke”

Getxo Urduliz

Uribe Kostako Agroasanbladako kidea da Peio Fuente nekazaria. Otzaren bitartez eta Itzubaltzeta/Romoko merkatuan saldu ohi ditu Urdulizen landutako...
“Gaur egun ez dakigu benetan zer jaten dugun; arazo handia da hori”

Getxo

Uribe Kostan eta inguruetan lurra lantzen ibili ondoren, Durangaldeko Garai aldera egin du salto Ana de la Maza baserritar getxoztarrak. Zortzi urt...